Папа - на 500-годдзе Рэфармацыі: свет чакае адзінства хрысціян

Паміж католікамі і лютэранамі існуе больш таго, што аб’ядноўвае, чым таго, што раздзяляе, сказаў Святы Айцец падчас экуменічнай падзеі з нагоды 500-годдзя Рэфармацыі. Яна прайшла вечарам 31 кастрычніка 2016 г. на тэрыторыі спартыўнага комплексу ў горадзе Мальмё.

Францішак падкрэсліў, што адным з плёнаў дыялогу паміж Каталіцкім Касцёлам і Сусветнай лютэранскай федэрацыяй стала супрацоўніцтва ў розных галінах сацыяльнай і гуманітарнай дзейнасці. 

Спасылаючыся на прагучаўшыя падчас сустрэчы сведчанні, Папа з удзячнасцю заўважыў, што ў кантэксце шматлікіх выклікаў існуюць людзі, якія прысвячаюць сябе будаванню свету, які адпаведае Божай задуме.

У першую чаргу ён адзначыў важнасць супольнай дзейнасці ў сферы аховы навакольнага асяроддзя. “Мы ўсе адказныя за ахову стварэння, асабліва хрысціяне. Наш лад жыцця, нашы паводзіны павінны адпавядаць нашай веры. Мы пакліканы развіваць гармонію з самімі сабой і іншымі, а таксама з Богам і плёнам Яго рук”, - дадаў Папа.

Каментуючы сведчанне аб супольнай сацыяльнай працы католікаў і лютэран у Калумбіі Пантыфік папрасіў аб асаблівай малітве за мір у гэтай краіне, які з’яўляецца “вельмі жаданым і неабходным для годнага чалавечага жыцця”.

Падчас мерапрыемства прагучалі сведчанні бежанцаў з Бурундзі і Паўднёвага Судану, якія знайшлі ў сябе сілы дапамагаць людзям, што знаходзяцца ў яшчэ горшых сітуацыях. “Для нас хрысціян прыярытэтам з’яўляецца выйсце насустрач адрынутым і маргіналізаваным нашага свету і заданне рабіць датыкальнай пяшчоту і міласэрную любоў Бога, які не адкідае нікога, але прымае ўсіх”, - сказаў Папа.

Францішак заклікаў удзельнікаў каталіцка-лютэранскай сустрэчы не дазволіць варожасці ўзяць верх над сабой і працаваць у еднасці. “Калі вернемся дамоў, возьмем на сябе абавязак штодзённа рабіць адзін жэст супакою і прымірэння, каб быць адважнымі і вернымі сведкамі хрысціянскай надзеі”, - сказаў Пантыфік.

На заканчэнне экуменічнай падзеі на “Мальмё-Арэне” прадстаўнікамі каталіцкай дабрачыннай арганізацыі “Caritas Internationalis” і Сусветным служэннем Сусветнай лютэранскай федэрацыі было падпісана пагадненне аб сумеснай працы ў спрыянні развіццю культуры супрацоўніцтва на карысць чалавечай годнасці і сацыяльнай справядлівасці.

Як Хрыстус з’яднаны з Айцом, так і мы павінны быць паяднаннымі паміж сабой, калі жадаем прыносіць плёны, сказаў Пантыфік падчас каталіцка-лютэранскай экуменічнай малітвы, што адбылася 31 кастрычніка 2016 г. у катэдральным саборы Лунда з нагоды 500-годдзя пачатку Рэфармацыі.

Францішак падкрэсліў, што супольная малітва сведчыць аб жаданні заставацца ў еднасці з Богам, а таксама з’яўляецца нагодай для падзякі за дзейнасць шматлікіх людзей, якія “не апусцілі рукі перад абліччам падзелу, але падтрымлівалі жывой надзею на прымірэнне паміж усімі, хто верыць у адзінага Пана”.

Святы Айцец нагадаў пра плённае развіццё дыялогу паміж Каталіцкім Касцёлам і Сусветнай лютэранскай федэрацыяй. Ён заклікаў не мірыцца з сітуацыяй падзелу і аддаленасці, а таксама пераадоліць супярэчнасці і непаразуменні паміж канфесіямі, працуючы на карысць адзінства, якога жадае сам Бог.

На думку Папы, трэба сумленна паглядзець на мінулае, прызнаць памылкі і прасіць прабачэння за тое, што адбывалася. Адначасова ён заўважыў, што стварэнне дыстанцыі паміж католікамі і лютэранамі, на працягу гісторыі ўмацоўвалі галоўным чынам моцныя гэтага свету, а не самі вернікі. 

Пантыфік спаслаўся на шчырае жаданне бакоў “вызнаваць і бараніць сапраўдную веру”, а таксама заклікаў прызнаць існаванне закрытасці “у саміх сабе з-за страху ці забабонаў адносна веры, якую іншыя вызнаюць з адрознымі акцэнтамі і праявамі” і пераадоліць яе.

Папа падкрэсліў, што Рэфармацыя паспрыяла заняццю Святым Пісаннем цэнтральнага месца ў жыцці Касцёла. Важныя крокі ў каталіцка-лютэранскім дыялогу былі зроблены менавіта “праз супольнае слуханне Божага Слова ў Святым Пісанні”, сказаў ён і заклікаў разам прасіць Бога, каб Яго слова захоўвала вызнаўцаў абедзьвюх канфесій у адзінстве. “Без яго натхнення мы не можам рабіць нічога”, - дадаў Пантыфік.

Паводле Святога Айца, сам досвед Марціна Лютэра і яго вечнае пытанне: “Як магу мець міласэрнага Бога?” кажа пра важнасць глыбокіх адносін з Панам, а паняцце “толькі дзякуючы Божай ласцы” нагадвае, што Бог заўсёды мае ініцыятыву і апярэджвае любы чалавечы адказ.

Францішак адзначыў, што свет чакае ад хрысціян адзінства і пераканаўчага сведчання міласэрнасці. “Разам мы можам абвяшчаць і канкрэтным чынам з радасцю дэманстраваць міласэрнасць Бога, баронячы і служачы годнасці кожнага чалавека. Без гэтага служэння свету і ў свеце, хрысціянская вера – няпоўная”, - падкрэсліў Пантыфік.

Пасля заканчэння экуменічнай малітвы ў лютэранскім катэдральным саборы Лунда, Францішак развітаўся з членамі шведскай каралеўскай сям’і і накіраваўся ў Мальмё. Адлегласць паміж гэтымі гарадамі складае каля 30 км. Папа пераадоліў іх на аўтобусе разам з старшынёй Сусветнай лютэранскай федэрацыі і іншымі членамі афіцыйных дэлегацыі Цэркваў.

Гістарычнай падзеяй назваў візіт Святога Айца ў Швецыю з нагоды 500-годдзя Рэфармацыі кардынал Дзяржсакратар Пьетра Паралін ў інтэрв’ю Ватыканскаму тэлевізійнаму цэнтру. Францішак наведае гэту скандынаўскую краіну з 31 кастрычніка па 1 лістапада 2016 г. 

Бліжэйшы супрацоўнік Папы падкрэсліў, што раней кожнае стагоддзе Рэфармацыі адзначалася ў духу палемікі, супрацьстаяння і нават варожасці. Сёлета гэта не так. “Упершыню католікі, праз прысутнасць Папы, і лютэране разам успамінаюць 500-годдзе Рэфармацыі. Я думаю, што сапраўды можна казаць пра гістарычны момант, вяху на шляху прымірэння і супольнага пошуку адзінства паміж Цэрквамі і царкоўнымі супольнасцямі”, - сказаў ён.

be.radiovaticana.va