У Дабравешчанне і 105-годдзе БНР вернікі моляцца за Беларусь

На свята Звеставання Пана, якое католікі і хрысціяне іншых канфесій адзначаюць 25 сакавіка, у 2023 годзе прыпадае 105-годдзе абвяшчэння незалежнасці Беларускай Народнай Рэспублікі. Гэта падзея паклала пачатак беларускай дзяржаўнасці і суверэнітэту краіны.

Хоць свята "Дзень волі" не з'яўляецца афіцыйным, яно шырока адзначаецца ў грамадстве, і ў гэты дзень вернікі ў індывідуальных малітвах асабліва просяць Госпада за Беларусь, дзе ўжо трэці год працягваецца грамадска-палітычны крызіс, да якога дадаюцца і эканамічныя праблемы. Глыбокая рана сыходзіць крывёй з-за падзелу ў грамадстве, росту варожасці, гвалту, пераследу, адсутнасці цярпімасці, вымушанага ад'езду з краіны дзясяткаў тысяч жыхароў, нарастаючага напружання ў стасунках з суседнімі краінамі.

Таму вернікі моляцца аб хутчэйшым вырашэнні крызісу, які знішчае краіну, вызваленні несправядліва зняволеных, уз'яднанні мноства падзеленых сем'яў, навяртанні тых, хто чыніць зло і знаходзіцца ў цемры падману, аб супакоі, узаемапаразуменні і прабачэнні, аднаўленні справядлівасці, перамозе дабра і праўды.

Таксама ў Дабравешчанне католікі пачынаюць традыцыйную 9-месячную малітву аб ненароджаных дзецях, якім пагражае аборт — перапыненне цяжарнасці хрысціяне лічаць забойствам дзіцяці, жыццё якога пачынаецца з моманту зачацця. Масавасць абортаў з'яўляецца яшчэ адной балючай праблемай сучаснага грамадства.