Беларускі біскуп спытаў у Папы Рымскага, як спыніць вайну Расіі з Украінай – і атрымаў адказ

Раніцай 19 верасня каталіцкія біскупы з Беларусі, якія ўдзельнічаюць у Рыме ў курсе заняткаў для новапрызначаных біскупаў, адпраўлялі святую Імшу ў базыліцы Святога Пятра і сустракаліся з Папам Рымскім Францішкам. Падчас аўдыенцыі дапаможны біскуп Пінскай дыяцэзіі Андрэй Зноска задаў Пантыфіку пытанне, якое цытуе старонка пінскага касцёла:

«Я біскуп з Беларусі, невялікай краіны, якая мяжуе і з Расіяй, і з Украінай. Прашу Вашай парады. Мы не можам і не хочам памяняць нашых суседзяў, яны такія, якія ёсць. Што мы павінны рабіць, каб вайна паміж нашымі суседзямі спынілася?»

Паводле біскупа, святы Айцец сказаў у адказ, што ведае Беларусь, «прасіў перадаць прывітанне для прэзідэнта Лукашэнкі» і сказаў, што «вы ў Беларусі добра ведаеце, што ніколі нельга закрываць дзверы для перамоваў, што трэба трымаць іх адкрытымі».

Папа падкрэсліў, што толькі будучы гатовымі слухаць і чуць адны другіх можна дайсці да добрага выніку. У канцы свайго адказу Святы Айцец заклікаў ніколі не губляць надзею і верыць у пераможную моц малітвы – толькі такі шлях да міру ён бачыць для веруючых людзей.

Наш канал в Telegram – только интересное и важное. Подписаться >