Пад Гомелем прайшоў хрысціянскі міжканфесійны фестываль [відэа]

Трэці год запар у вёсцы Церуха Гомельскага раёна, на падворку праваслаўнага Свята-Нікольскага мужчынскага манастыра ладзіцца хрысціянскі міжканфесійны маладзёжны фестываль «Хрыстос пасярод нас». У гэтым годзе ў Церусе сабралася амаль сто маладых людзей праваслаўнай і каталіцкай канфесій, паведамляе katolik-gomel.by.

Пасля набажэнства і гульняў на знаёмства парафіянін гомельскага касцёла Мікалай Казубенка, які вучыўся ў семінарыі, прачытаў грунтоўную лекцыю пра тое, што аб'ядноўвае каталікоў і праваслаўных. Айцец Сава Мажука выступіў з лекцыяй аб Святой Тройцы і служэнні прымірэння. Пасля чаго, нарэшце, усталявалася сонечнае надвор'е, што дазволіла ўдзельнікам фестывалю пагуляць у рухомыя спартыўныя гульні.

Увечары пачалася асноўная частка сустрэчы - канцэрт, на якім выступалі святары і свецкія з музычнымі і танцавальнымі нумарамі. Завяршыўся першы дзень фестывалю феерверкам, песнямі і гутаркай ля вогнішча, а назаўтра госці ўдзельнічалі ў Літургіі, экалагічным трэнінгу і спартыўных гульнях.

- Удзел у фестывалі - гэта выдатная магчымасць прадэманстраваць свае таленты, пазнаёміцца і пагутарыць з цікавымі людзьмі ў нефармальнай абстаноўцы, - адзначылі арганізатары.