Біць у званы - новае служэнне гомельскіх скаўтаў [відэа]

Па нядзелях ранішні спакой стомленага начнымі забавамі Гомеля парушае бадзёры спеў касцёльных званоў. Каталіцкі храм стаіць у самым цэнтры горада - побач з казіно, гульнявымі клубамі, кафэ, дыскабарамі - нібы нагадваючы ахвярам індустрыі забаваў аб вечным.

Званар, які ўжо дзесяць гадоў будзіць Гомель, запрашаючы на свята да Госпада, - даўні вернік, 75-гадовы Эдуард Іванавіч Скульмоўскі:

- Наогул, трэба тры чалавекі, каб «песня» атрымлівалася прыгожай. Але наша моладзь любіць паспаць, у храм прыходзіць перад самым пачаткам Святой Імшы, таму часта даводзіцца званіць аднаму. А часам нехта дапамагае, нават дзеці - ім гэта вельмі падабаецца! Нічога складанага ў гэтым няма, галоўнае, каб званы адначасова рухаліся ў процілеглыя бакі. Звонім у спецыяльных навушніках.

А нядаўна да цікавай і пачэснай справы запрасілі далучыцца гомельскіх скаўтаў. Хлопчыкі і дзяўчынкі пад кантролем дарослых цяпер самі кожную нядзелю б'юць у званы, склікаючы горад на Святую Імшу. Дарэчы, цяпер, дзякуючы дапамозе скаўтаў, званы сталі біць не толькі перад ранішняй службай, але і перад абедняй.

Чытайце таксама: Як у гомельскім касцёле з'явіліся званы >>>