Як прасоўваецца рэканструкцыя Чырвонага касцёла ў Мінску – фотафакт

У Мінску працягваецца рэканструкцыя комплексу каталіцкага храма святога Сымона і святой Алены, вядомага як Чырвоны касцёл. Свежыя фота, як прасоўваюцца працы, мы заўважылі ў сацсетцы.

Афіцыйнай інфармацыі аб ходзе рэканструкцыі няма, у парафіі таксама не было аб'яў на гэты конт.

Нагадаем, работы пачаліся летам і павінны завяршыцца да студзеня 2027 года. Таму вернікі пачалі зваротны адлік і спадзяюцца, што да адкрыцця храма, закрытага ўжо больш за тры гады, засталося крыху больш за адзін год.

Праўда, пакуль няма ніякай яснасці, ці ўпусцяць парафію ў Чырвоны касцёл пасля завяршэння рэканструкцыі. Былы пробашч ксёндз Уладзіслаў Завальнюк у сваім нядаўнім відэа казаў пра тое, што расцэньвае рэканструкцыю, як «пасільную дапамогу дзяржавы» католікам, якая «шмат матэрыяльнай дапамогі надае ў рэстаўрацыі і будаўніцтве праваслаўных храмаў».

Таксама святар распавядаў, што стараецца часта наведваць плошчу перад храмам, каб маліцца аб яго больш хуткім адкрыцці.

Ён адзначаў, што на рэканструкцыі Чырвонага касцёла працуюць наёмныя работнікі мусульмане з краін Азіі, і нагадваў, што і пры будаўніцтве храма працавалі мусульмане – «магчыма, у падзяку за клопат Эдварда Вайніловіча [фундатара Чырвонага касцёла] перад царом, каб мусульмане мелі сваю мячэць у Мінску».