Каталіцкага манаха з Мінска прызвалі на ваенныя зборы?

Настаяцель манаскай супольнасці кармэлітаў у Мінску айцец Сяргей Трысцень ужо два дні інтрыгуе вернікаў. У сваіх сацсетках ён публікуе фота, на якіх ён не ў звыклым хабіце, а ва ўніформе з камуфляжным малюнкам. Пад адным са здымкаў святар пакінуў подпіс: «Хрыстос уваскрос! На зборах».

Пад яго пастамі з'явілася мноства каментароў, у якіх вернікі выказваюць здзіўленне і задаюць пытанні, але манах на іх не адказвае. У прыватнасці, вернікі цікавяцца, ці можа святар адпраўляць святую Імшу. 

Калі сапраўды айца Сяргея прызвалі на зборы, то гэта першы вядомы выпадак прыцягнення каталіцкага духавенства ў Беларусі да ваенных мерапрыемстваў.

Праўда, пазней святар адрэдагаваў допісы і замест «на зборах» напісаў «у вёсцы». Аднак працягнуў публікаваць фота, падобна, з тэрыторыі былога ваеннага аб'екта. Адзін са здымкаў, на фоне макета лакатара, верагодна, у закінутай вайсковай частцы, манах падпісаў: «СПА руліць». 

На фота святар не ў ваеннай форме – адзенне выглядае як працоўны касцюм у камуфляжнай расфарбоўцы. Але вядомы выпадкі, калі такую ўніформу выдавалі на зборах тэрытарыяльнай абароны з ваеннаабавязанымі з запасу. 

У апошнія месяцы ў Беларусі масава прызывалі мужчын на розныя зборы, у тым ліку ў рамках «раптоўнай праверкі боегатоўнасці» Узброеных Сіл.   

Тэрытарыяльныя войскі – род войскаў УС, які склікаецца ў перыяд вайны або напружанай ваенна-палітычнай абстаноўкі, выконвае дапаможныя функцыі.