Без працэсіі па вуліцах: як сёлета пройдзе урачыстасць Божага цела ў Мінску

Упершыню за апошнія гады ў Мінску не будзе публічнага святкавання ўрачыстасці Найсвяцейшага Цела і Крыві Хрыста, якую католікі ў 2021 годзе адзначаць 3 і 6 чэрвеня. Нагадаем, раней з гэтай нагоды шматтысячныя працэсіі Божага цела праходзілі па цэнтральных вуліцах беларускай сталіцы - з прыпынкамі на плошчы Перамогі, на Кастрычніцкай плошчы, каля Чырвонага і катэдральнага касцёлаў.

Летась з прычыны пандэміі свята прайшло без працэсіі па вуліцах, аднак вернікі збіраліся на плошчах перад катэдральным і Чырвоным касцёламі.

А сёлета агульнамінская працэсія Божага Цела адбудзецца толькі на прыкасцёльнай тэрыторыі парафіі Найсвяцейшай Тройцы (св. Роха) на Залатой Горцы. Пра гэта гаворыцца ў паведамленні Апостальскага адміністратара Мінска-Магілёўскай архідыяцэзіі біскупа Казіміра Велікасельца, апублікаваным на Сatholic.by.

Улічваючы складаную эпідэміялагічную сітуацыю ў краіне, прапануецца адзначыць урачыстасць Божага Цела ў Мінску наступным чынам: 3 чэрвеня правесці святыя Імшы ў сваіх парафіях, а 6 чэрвеня а 10.00 гадзіне адбудзецца ўрачыстая святая Імша і агульнамінская працэсія Божага Цела, на якую запрашаюцца вернікі з усіх парафій.