На дрэве ў Мікашэвічах людзі ўбачылі аблічча Багародзіцы

Аб чарговым выпадку нібыта праявы на дрэве Нерукатворнай выявы Найсвяцейшай Панны Марыі пішуць беларускія СМІ. Як паведамляецца, абрысы аблічча Багародзіцы мясцовыя жыхары ўбачылі на дубе, які расце на старых могілках у райцэнтры Мікашэвічы Брэсцкай вобласці.

Па словах адной з мясцовых жыхарак, малюнак спачатку быў недакладным, быў бачны толькі сілуэт, але паступова абрысы станавіліся больш прыкметнымі. Мясцовыя жыхары ўжо павязалі на дрэва дзясяткі ручнікоў і стужачак, штодня ў да дуба прыходзяць і прыязджаюць дзясяткі «паломнікаў».

Аднак падобныя «цуды», як правіла, Царква не прызнае. Калі аблічча Багародзіцы таксама ўбачылі на дрэве 2012 годзе ў вёсцы Губарэвічы Хойніцкага раёна, праваслаўны епіскап Тураўскі і Мазырскі Стэфан расчараваў «вернікаў», адзначыўшы, што ніякага аблічча і цуду на дрэве ён не ўбачыў. І патлумачыў людзям, што гэта паганства і святатацтва: класці пад дрэва грошы, цукеркі.