Самы паважаны каталіцкі іерарх адзначыў 80-годдзе. За што яму падзякавалі беларусы?

Арцыбіскуп эмэрыт Тадэвуш Кандрусевіч 3 студзеня адзначыў 80-годдзе і адправіў святую Імшу ў архікатэдральным касцёле ў Мінску ў прысутнасці біскупаў, святароў і свецкіх вернікаў.

На пачатку Імшы заслужаны іерарх падзякаваў Богу за ўсе гады свайго служэння, за тое, што дажыў да гэтага юбілею, хоць з дзяцінства меў слабае здароўе, папрасіў аб малітве, каб і надалей ён мог выконваць свае біскупскія абавязкі, хоць ужо і не з'яўляецца кіраўніком архідыяцэзіі. Нагадаем, пяць гадоў таму арцыбіскуп Кандрусевіч пакінуў пасаду Мітрапаліта Мінска-Магілёўскага.

Юбілей самага паважанага беларускага каталіцкага іерарха сучаснасці прыцягнуў увагу карыстальнікаў сацсетак. Многія выказаліся аб тым, за што менавіта хочуць падзякаваць арцыбіскупу Кандрусевічу.

З прапановай выказаць падзяку юбіляру звярнуўся да падпісчыкаў каталіцкі актывіст Арцём Ткачук. З таго, што яны напісалі, мы выбралі 10 разнастайных падзякаў:

– За тое, што ў розныя часы ўмеў быць з людзьмі, з вернікамі.

– За беларускую мову ў Касцёле, за энергію, дабрыню і святло.

– За ясную пазіцыю ў 2020 годзе.

– За адданасць Богу і Радзіме, за чалавечнасць і міласэрнасць.

– За смеласць казаць праўду.

– За годнае развітанне з Кастусём Каліноўскім.

– За тое, што слухаў і чуў меркаванні розных вернікаў – як духавенства, гэтак і свецкіх, незалежна ад тытулаў і ўзросту.

– На фоне некаторых іншых – увогуле за ўсё. За Трыдэнцкую Імшу ў Магілёве.

– За тое, што ён верны Хрысту не на словах, а і ў жыцці, у служэнні.

– За сэрца, з якім служыць Хрысту і Касцёлу.

Наш канал в Telegram – только интересное и важное. Подписаться >