На нябёсах толькі і гавораць, што пра мора... [фотааповед]
- Written by Ольга Клюй
- Published in Хрысціянскае меркаванне
- Comments (1)
Навукоўцы спрачаюцца аб вялікім выбуху і нейкім там "першабытным булёне"? Проста яны не бачылі закат на Валааме.
…Зразумей, на нябёсах толькі і гавораць, што пра мора! Як яно бясконца цудоўна. Пра захад, які яны бачылі. Пра тое, як сонца, апускаючыся ў хвалі, стала пунсовым як кроў. І адчулі, што мора ўвабрала энергію свяціла ў сябе. І сонца было ўтаймавана. І агонь ужо дагараў у глыбіні. А ты? Што ты ім скажаш? Бо ты ні разу ня быў на моры." (фільм "Дастукацца да нябёсаў")
Верасень. Востраў Валаам - праваслаўная святыня. Дарога на востраў - на турыстычным цеплаходзе па Ладажскім возеры. Падарожжа - хутчэй забаўка, чым паломніцтва.
Падчас экскурсіі па Валааму ў галаве, вядома, бязладдзе - шмат гістарычнай інфармацыі, вобразы цудоўнай прыроды. Пачутае трэба запомніць, убачанае - сфатаграфаваць. А потым некалькі гадзін вольнага часу. І вось я спыняюся на камяністым беразе, гляджу вакол... і мяне накрывае хваля такой вялікай любові, такога захаплення! Мурашкі не тое, што па скуры, па сэрцы бягуць. І такое адчуванне, што Сам Бог у гэты момант абдымае мяне. І мне не патрэбны словы, каб гаварыць з Ім. Мае меркаванні пра Бога на той момант былі досыць наіўныя і казачныя, якія сфармаваліся выключна на Бібліі ў малюнках. Але я падумала, што рай, павінна быць, выглядае менавіта так.
Самае пацешнае, што пасля вяртання дадому ўнутраны дух ад падарожжа на гэты дзіўны востраў прывёў мяне ў касцёл. І якое ж было маё здзіўленне, што ў каталіцкім касцёле "жыве" той самы Бог, што і на праваслаўным Валааме. І цяпер я заўсёды адчуваю, як Ён абдымае мяне. Калі толькі я сама не бягу ад Яго, спрабуючы за кустамі схаваць галізну сваіх грахоў і слабасцяў. І Бог паказаў мне цікавую рэч. Ён не выбірае будынак царквы канкрэтным і адзіным месцам для сустрэчы з Ім. Ён прыходзіць туды, дзе я цяпер. Ён першым працягвае мне руку. І для Яго я - не праваслаўная альбо каталік. Я - Яго дзіця.
Калі наш цеплаход адплываў ад вострава, сонца як раз садзілася. А з дынамікаў гучаў запіс царкоўных спеваў у выкананні хору Валаамскіх манахаў. Думаю, цяжка падабраць словы, каб апісаць гэты цуд, ды і Ладага - не мора, але мне будзе, пра што гаварыць на небе.
Навукоўцы спрачаюцца аб вялікім выбуху і нейкім там "першабытным булёне"? Проста яны не бачылі закат на Валааме.
Related items
- «Бог даў нам адсутнасць паветранай трывогі». Пра Дзень дзіцяці ў Жытоміры распавёў біскуп
- Пад'ём у 3:30, маўчанне і ніякіх гаджэтаў. Адзіны ў свеце беларус камельдул наведаў родны горад
- «У парафіі 15-20 асоб». Мітрапаліт абвясціў акцыю па падтрымцы Касцёла на Магілёўшчыне
- Не фэйкі і не хакеры: «Радыё Марыя» працягвае збор і тлумачыць непаразуменні
- «Уразіла міласэрнасць». Што здзівіла ў Беларусі самотнага пілігрыма пасля Кітая і ЗША
RSS-стужка каментароў гэтага запiсу