У Беларусь у электронным выглядзе вярнулася кніга Скарыны

У Нацыянальную бібліятэку Беларусі ўрачыста перадалі «Першую кнігу Царстваў», якую выдаў знакаміты беларускі першадрукар Францыск Скарына амаль паўтысячагоддзя таму. Выданне прыбыло з Кембрыджа пакуль у лічбавай копіі, а перадача арыгінала чакаецца прыкладна праз год - пакуль на гэты конт вядуцца перамовы. Магчыма, у 2017 годзе, калі ў Беларусі будуць адзначаць 500-годдзе айчыннага кнігадрукавання, Вялікабрытанія парадуе Радзіму Скарыны каштоўным падарункам.

«Першая кніга Царстваў» - частка Старога Запавету Бібліі - была выдадзена Францыскам Скарынам у Празе ў 1518 годзе. На жаль, у Кембрыджы знаходзіцца не поўная кніга - захаваўся толькі фрагмент выдання. Аднак і ён з'яўляецца нацыянальнай святыняй і каштоўнасцю сусветнага ўзроўню.

Вядома, што з прыкладна 500 асобнікаў кніг Скарыны ў Беларусі захоўваюцца толькі дзесяць - астатнія раскіданыя па свеце.

Нагадаем, беларускага першадрукара Францыска Скарыну могуць прызнаць святым.