Адзначыць Дзень святога Валянціна запрашае адзіны ў Беларусі аднайменны касцёл

Люты 10, 2020
Written by Katolik.life
Published in Царква
Add new comment

Імшу будзе служыць арцыбіскуп Тадэвуш Кандрусевіч, канцэрт дадуць удзельнікі гурта "Стары Ольса"

14 лютага Каталіцкая царква адзначае Дзень святых Кірылы і Мяфодзія, асветнікаў славян і заступнікаў Еўропы. Аднак тая ж дата больш вядомая ў свеце як Дзень святога Валянціна або Дзень усіх закаханых. Сапраўды, на 14 лютага ў Касцёле таксама прыходзіцца ўспамін каталіцкага святога Валянціна, біскупа і мучаніка.

Пра гэтага святога захавалася вельмі мала звестак. Ён быў біскупам у італьянскім горадзе Церні, дзе каля 268 года прыняў пакутніцкую смерць, абставіны якой не вядомыя. Паводле легенды, тагачасны імператар лічыў, што самотны мужчына - без сям'і, жонкі і абавязкаў - лепш змагаецца на поле бітвы, і забараніў мужчынам жаніцца. Святы Валянцін употай асвячаў шлюбы, за што яго кінулі ў турму і адсеклі галаву.

У Беларусі ёсць толькі адна парафія святога Валянціна - у Смалявічах Мінскай вобласці. І 15 лютага ў суботу - каб болей людзей змаглі прыняць удзел - тут адзначаецца парафіяльная свята:

- Нашым галоўным цэлебрансам і прапаведнікам будзе арцыбіскуп мітрапаліт Мінска-Магілёўскі Тадэвуш Кандрусевіч, распавёў пробашч брат Сяргей Мацюшонак і паведаміў парадак фэсту:

9.00 – выстаўленне Найсвяцейшага Сакраманту і адарацыя да гадзіны 10.45. У гэтым часе магчымасць споведзі;
10.45 – прывітанне кс. Арцыбіскупа;
11.00 – урачыстая адпустовая Св. Імша;
Пасля Св. Імшы – выстаўленне Найсвяцейшага Сакраманту, літанія да Св. Валянціна, гімн “Цябе Бога праслаўляем” і благаслаўленне Найсвяцейшым Сакрамэнтам. Уцалаванне Рэліквіяў Св. Валянціна.

Пасля малітваў у касцёле у ніжняй зале адбудзецца працяг святкавання, невялікая культурная праграма і супольны пачастунак. Сёлета парафію наведае спадар Алесь Чумакоў, гусляр і мультыінструменталіст, саліст гурта «Стары Ольса», а таксама Таццяна Ячная, салістка гэтага гурта. Дзеці і моладзь пакажуць кароткую сцэнку.

- Запрашаем усіх нашых парафіянаў і гасцей да актыўнага ўдзелу ў нашым парафіяльным свяце! Сёлета зноў будзем рыхтаваць польскі бігос, - дадалі ў парафіі.