Бэтлеемскі агонь міру, які ужо прывезлі ва Украіну, даставяць у Беларусь і Расію

Штогадовая акцыя скаўтаў адбудзецца і сёлета: у Беларусь даставяць Святло міру з Бэтлеему. Пра гэта пакуль не паведамлялася афіцыйна, але ў некаторых парафіях ужо анансавалі акцыю.

Першымі Бэтлеемскі агонь, пасля перадачы польскімі скаўтамі, традыцыйна сустрэнуць у катэдральным касцёле Гродна – 18 снежня а 17-й гадзіне. Пасля гэтага каталіцкія скаўты пачнуць развозіць Святло міру па ўсёй Беларусі. У многіх парафіях будуць сустракаць агонь з Бэтлеему ў суботу 20 снежня і назаўтра, у апошнюю нядзелю Адвэнту.

У касцёлах кожны жадаючы зможа запаліць лампаду, каб аднесці сімвал Раства ў свае дамы – каб праз гэты знак Божыя любоў і мір запанавалі ў сэрцах.

Святло міру ўжо даставілі ва Украіну, таксама яго будуць сустракаць у Расіі.

У Кіеве на цэнтральнай плошчы Бэтлеемскі агонь перадавалі ўсіх жадаючым. Таксама яго прымаў ад скаўтаў асабіста прэзідэнт Украіны Уладзімір Зяленскі. Да акцыі па дастаўцы Святла міру ва ўсе гарады краіны далучылася Украінская чыгунка (на галоўным фота).

Пазней агонь з Бэтлеему атрымаюць расійскія праваслаўныя скаўты. Яны будуць дастаўляць Святло міру ў гарады краіны да Божага Нараджэння ў праваслаўных, якія святкуюць яго 7 студзеня.

Ужо больш за 20 гадоў у Беларусь прывозяць Бэтлеемскі агонь з Польшчы, якая прымае сімвал Раства ад славацкіх скаўтаў, а ім перадаюць яго аўстрыйцы – пасля таго, як на самалёце ў Вену дастаўляюць Святло міру, запаленае ў базыліцы Раства Хрыстова ў Бэтлееме – месцы нараджэння Езуса Хрыста. Такім чынам сімвал каляднага паслання трапляе ў больш чым 25 краін, акцыя скаўтаў уяўляе сабой своеасаблівую эстафету.

Наш канал в Telegram – только интересное и важное. Подписаться >