Заснежаныя вёскі, песні, народная пабожнасць – як ходзіць ксёндз па Калядзе на Гродзеншчыне

Найбольш актыўна асвятляе свае калядныя візіты ў дамы вернікаў пробашч касцёла Унебаўзяцця Найсвяцейшай Панны Марыі ў Дзятлаве ксёндз Андрэй Лішко. У парафіяльным Instagram ён зноў адкрыў рубрыку «Ходзіць ксёндз па Калядзе» і выкладвае здымкі з наведвання вернікаў у вёсках – у асноўным, пажылых людзей.

Святар публікуе сэлфі з парафіянамі, паказвае хатнія алтарыкі, якія адлюстроўваюць народную набожнасць – такія куткі з абразамі ў дамах сваіх бабуль памятаюць многія.

Ксёндз дзеліцца фота з мясцовымі краявідамі і відэа з песнямі [глядзіце ніжэй].

Падчас візітаў святар спявае разам з бабулямі не толькі польскія калядкі, але і беларускія народныя і эстрадныя песні, добра ведаючы іх тэкст.

Душэўныя допісы святара выклікаюць эмацыйныя каментары:

«Ведаеце, што самае цёплае і роднае ў гэтых малюнках? Гэта душэўнае зліццё з чалавекам, вось так – шчака да шчакі, у размовах, у песнях, у душэўнай адкрытасці».

«Дарагія бабулі, вы – нашы маякі аптымізму, жыццялюбства, крыніцы невычэрпнай энергіі. Прыклад таго, як любіць жыццё, спяваць сэрцам і несці святло, нягледзячы на ўсе жыццёвыя нягоды. Дзякуй за вашыя цёплыя вочы, за вашу мудрасць, дабрыню і веру ў лепшае».