Беларускі біскуп у Польшчы: жыць у згодзе, нягледзячы на палітычную кан'юнктуру

Генеральны вікарый Пінскай дыяцэзіі біскуп Андрэй Зноска прымаў удзел у кангрэсе нямецкіх католікаў Katholikentag у якасці прадстаўніка беларускага Каталіцкага Касцёла.

Па дарозе ён спыніўся ў польскім Вроцлаве, дзе цэлебраваў святую Імшу ў архікатэдральным касцёле. Як паведаміў пінскі іерарх на сваёй старонцы, падчас Імшы ён маліўся «аб Божым благаслаўленні для Беларусі і Польшчы, каб нашыя людзі заўсёды жылі ў згодзе і добрасуседстве, памятаючы аб сваёй супольнай каталіцкай спадчыне і слаўным адзінстве ў старадаўняй Рэчы Паспалітай Вялікага Княства Літоўскага і Кароны Польскай».

Біскуп заахвоціў вернікаў да таго, каб яны «не звярталі ўвагі на палітычную кан'юнктуру і часовыя цяжкасці ва ўзаемных адносінах».

Як адзначыў іерарх, ён верыць у тое, што «народы, якія Бог размясціў побач па-суседску, заўсёды змогуць дагаварыцца паміж сабой і жыць шчасліва, калі не будуць закрываць свае дзверы, а наадварот, пачнуць слухаць і старацца пачуць і зразумець адзін аднаго».

Таксама па дарозе на форум біскуп Андрэй Зноска цэлебраваў святую Імшу ў нямецкім горадзе Фульда. Тут ён падзякаваў католікам Германіі «за дапамогу ў адраджэнні Каталіцкага касцёла ў Беларусі пасля дзесяцігоддзяў атэістычнага пераследу з боку бальшавіцкай улады» і служыў Эўхарыстыю за дабрадзеяў і ахвярадаўцаў Пінскай дыяцэзіі.

Біскуп Андрэй Зноска – на дадзены момант адзіны каталіцкі іерарх у Беларусі, які дапускае хаця б мінімальныя і стрыманыя публічныя выказванні, у якіх фігуруе грамадска-палітычная сітуацыя, тэмы вайны супраць Украіны і наступстваў камуністычнага пераследу вернікаў.

Наш канал в Telegram – только интересное и важное. Подписаться >