Часціцу мошчаў святой Маці Тэрэзы даставілі ў Гомель [фота]
- Written by katolik-gomel.by
- Published in Навіны - Гомель
- Add new comment
Кананізацыю Маці Тэрэзы адзначылі Імшой падзякі, праглядам фільма і салодкім сталом.
Увечары 9 верасня ў гомельскай рыма-каталіцкай царкве прайшла Імша падзякі за кананізацыю Маці Тэрэзы, а таксама выстаўленне часціцы мошчаў новай святой. Рэліквію даставіла з Ватыкана група парафіянаў на чале з пробашчам кс. Славамірам Ласкоўскім - яны ўдзельнічалі ва ўрачыстасцях з нагоды кананізацыі Маці Тэрэзы 4 верасня 2016 года (гл. ВІДЭА). Нагадаем, сёстры кангрэгацыі Маці Тэрэзы, якія служаць у Гомелі, не змаглі адправіцца ў Рым, але назіралі за кананізацыяй заснавальніцы ордэна праз інтэрнэт. Прамую трансляцыю з Ватыкана для сясцёр і жыхароў Дома міласэрнасці арганізавалі вернікі касцёла, паколькі самі манахіні, паводле свайго статуту, не маюць кампутараў і іншых тэхнічных сродкаў.
З гэтага часу адзін крыж з часціцай мошчаў святой Маці Тэрэзы будзе пастаянна знаходзіцца ў гомельскім Доме міласэрнасці сясцёр Місіянерак Міласэрнасці (сясцёр Маці Тэрэзы) - адзіным у Беларусі. А другі крыж з рэліквіяй новай каталіцкай святой - у касцёле Нараджэння Божай Маці.
На Імшу падзякі сястры запрасілі ўсіх, каму аказваюць дапамогу - гэта бедныя і бяздомныя людзі, праблемныя сем'і, як правіла шматдзетныя. Большасць з іх - праваслаўныя. Аднак у гэты дзень яны напоўнілі каталіцкі храм, каб разам з сёстрамі дзякаваць Госпаду за святасць Маці Тэрэзы.
Пасля службы ў храме прайшоў прагляд дакументальнага фільма пра жыццё святой Маці Тэрэзы, а сёстры зладзілі для ўсіх салодкі стол. Раней, 7 верасня, у гонар заснавальніцы свайго ордэна сёстры Місіянеркі Міласэрнасці правялі святочны абед для бяздомных і бедных.
ЧЫТАЙЦЕ ПА ТЭМЕ: Чаму святасць іншых выклікае ў табе лютасць, чалавек гэтага свету? >>>
Нагадаем, адзіныя ў Беларусі прадстаўнікі ордэна Маці Тэрэзы служаць у Гомелі. Сёстры з розных краін утрымліваюць Дом міласэрнасці, у якім дапамагаюць бедным і бяздомным ужо больш за 20 год і займаюцца многімі справамі, за якія мала хто хацеў брацца. Дом Міласэрнасці служыць прытулкам для некалькіх хворых мужчын і жанчын, якія апынуліся на вуліцы без сродкаў да існавання. Сёстры даглядаюць за імі, лечаць, дапамагаюць кінуць піць, аднавіць дакументы і ўладкавацца на працу. Місіянеркі рыхтуюць абед для бяздомных, раздаюць прадукты і адзенне для бедных сем'яў і адзінокіх старых, працуюць з дзецьмі з малазабяспечаных і праблемных сем'яў. Парафіяне касцёла дапамагаюць у Доме міласэрнасці карміць жабракоў, прыходзячы на працу ў сталовую. Дапамагчы можа кожны: напрыклад, раздаць ежу, памыць посуд, прынесці вопратку ці абутак.
Related items
- Песня з хрысціянскімі матывамі ад Украіны заняла трэцяе месца на Еўрабачанні
- «Зробім каталіцкае ТБ». Два моцныя YouTube-праекты запусцілі святары і манахіня
- Названа «лепшае фота» з палярным ззяннем – над прыдарожным крыжам
- Над дамамі і храмамі: здымкамі яркага палярнага ззяння дзеляцца ў сетках
- Святары з Шуміліна застаюцца ў зняволенні, таксама была затрымана парафіянка