У гасцях у каталікоў Сіцыліі - ФОТА

Ужо чатыры гады запар наша сям'я летам адпачывае ў Італіі, на востраве Сіцылія. Месца, у якім мы праводзім адпачынак, называецца Казуццэ (Casuzze). Гэта невялікая вёска ў правінцыі Рагуза на поўдні Сіцыліі, на беразе Міжземнага мора.

У зімовыя месяцы ў Казуццэ пражывае ўсяго некалькі сем'яў, аднак летам, асабліва ў ліпені і жніўні, сюды з'язджаецца мноства адпачываючых, сярод якіх у асноўным сіцылійцы з іншых частак выспы. Прыязджаюць на адпачынак і жыхары кантынентальнай Італіі і зусім трохі - турысты з іншых краін, сярод якіх і наша сям'я.

У Казуццэ ў нас з'явілася шмат сяброў і знаёмых. Сіцылійцы вельмі рады гасцям, добразычлівыя, адкрытыя, заўсёды гатовыя дапамагчы. Усе без выключэння вельмі любяць дзяцей! Дзякуючы іх гасціннасці наша сям'я змагла адчуць сябе часткай Казуццэ, а вяртацца туды нам хочацца зноў і зноў.

У Казуццэ ёсць дзве царквы - Chiesa della Transfigurazione (Царква Праабражэння) і Chiesa Mater Ecclesiae (Маці Царквы). Абедзве знаходзяцца на адкрытым паветры. Святая Імша тут праводзіцца толькі ў перыяд з чэрвеня па верасень. На працягу астатніх месяцаў года парафіяне ездзяць на імшу ў суседнія больш буйныя мястэчкі. Пастаяннага святара ў вёсцы няма. Кожны раз імшу праводзяць розныя святары з суседніх парафій.

Спадзяюся, вам будзе цікавы невялікі фотарэпартаж з царквы Mater Ecclesiae, якую мы звычайна наведвалі. Святая імша ў ёй адбываецца не ў нядзелю, а вечарам у суботу. На гэты раз набажэнства праводзіў айцец Фабіа з суседняга горада Санта Крочэ Камерына (Santa Croce Camerina). Пасля імшы я пагутарыла з падрэ, трохі распавяла яму пра Гомель, нашу парафію і пробашча.

На гэтай службе нашаму сярэдняму сыну Радзівону прапанавалі разам з іншымі дзецьмі збіраць ахвяраванні. А ў наступным годзе, магчыма, ён нават паспрабуе спяваць у невялікім хоры. Нездарма нашы дзеці ўжо цэлы год вучаць італьянскую мову!