Адыйшоў у вечнасць выбітны перакладчык Бібліі - Васіль Сёмуха

Ва ўзросце 83-х гадоў адыйшоў у вечнасць Васіль Сяргеевіч Сёмуха - лаурэат дзяржаўнай прэміі імя Якуба Коласа (1992 г.), лаўрэат Літаратурнай прэміі ПЭН-Цэнтру. Ён знакаміты дзясяткамі перакладаў на беларускую мову сусветна вядомых літаратурных твораў, а ў першую чаргу - Святога Пісання.

- Не стала Васіля Сёмухі - самага выбітнага беларускага перакладчыка… Светлы, мілы, дасціпны, энцыклапедычна адукаваны, гранічны шчыры і інтэлігентны, - паведаміў у Facebook блогер Глеб Лабадзенка.

Васіль Сёмуха нарадзіўся на тэрыторыі цяперашняга Пружанскага раёну. Перакладаў на беларускую мову з нямецкай, польскай, латышскай, лацінскай, іспанскай, нарвежскай, армянскай, украінскай і іншых моваў. За 14 гадоў напісаў беларускамоўны пераклад Бібліі, які выкарыстоўваецца ў набажэнствах розных беларускіх хрысціянскіх цэркваў. Пераклад Бібліі, здзейснены Васілём Сёмухам, быў выдадзены ў 2002 годзе ў Мінску тарашкевіцай, даступны таксама ў Інтэрнэце.