Правядзенне служб у касцёлах на польскай мове на Гродзеншчыне назвалі незаконным

Падчас сустрэчы 28 лютага кіраўніцтва Іўеўскага раёна са святарамі па тэме «развіцця этнаканфесійнай сферы» акцэнт зрабілі на праблемных пытаннях, паведаміла газета райвыканкама. Адным з такіх названа правядзенне ў каталіцкіх парафіях святых Імшаў на польскай мове.

«Праблемным застаецца выкарыстанне польскай мовы падчас службаў у каталіцкіх храмах раёна, што недапушчальна згодна з Законам Рэспублікі Беларусь "Аб мовах у Рэспубліцы Беларусь"», – заявіла загадчыца сектара ідэалагічнай работы і па справах моладзі Вольга Барко.

Адзначым, што правядзенне святых Імшаў на польскай мове ў каталіцкіх парафіях Беларусі, асабліва на захадзе краіны, – традыцыя, якая склалася гістарычна. У касцёлах службы праходзяць як на беларускай, так і на польскай мовах – для прадстаўнікоў польскай дыяспары і для тых, хто з дзяцінства прывык маліцца па-польску.

Напрыклад, у Іўеўскім касцёле ў нядзелю дзве ранішнія нядзельныя Імшы праходзяць на польскай мове (як правіла, з раніцы ў храмы прыходзіць больш старэйшых людзей), а ў абед (для дзяцей і маладых бацькоў) і ўвечары (для моладзі) – на беларускай мове.

Падкрэслім таксама, што Каталіцкая царква – значыць, «сусветная», яе літургія перакладзена амаль на ўсе мовы свету, і служыць святыя Імшы прынята на той мове, якую добра разумеюць удзельнікі службы. Напрыклад, у касцёлах Беларусі часта праводзяць службы не толькі па-польску, але і па-ангельску – для студэнтаў з Азіі і Афрыкі. Выкарыстанне ў літургіі замежнай мовы ніяк не супярэчыць законам Беларусі.

З іншага боку, самі католікі дыскутуюць пра тое, наколькі прапарцыйна правядзенне святых Імшаў па-польску і па-беларуску ў заходняй частцы краіны. Але гэта – пытанні саміх парафій і дыяцэзій, дзе кіруюцца пажаданнямі вернікаў.

Наш канал в Telegram – только важное. Подписаться >

Таксама сярод інфармацыі, якая прагучала на сустрэчы ў райвыканкаме, – правядзенне ідэалагічнымі работнікамі маніторынгу дзейнасці нядзельных школ пры храмах. А прадстаўнік мясцовай міліцыі выказаў гатоўнасць прыходзіць у нядзельныя школы, каб праводзіць прафілактычную работу з дзецьмі па супрацьдзеянні распаўсюджванню наркотыкаў. Гэтую ж тэму прадстаўнік РАУС папрасіў святароў «уключыць у пропаведзі».