Даследчыца з Акадэміі навук пачала знаёміць у сеціве са старажытнымі беларускімі абразамі. Першы – Маці Божай Снежнай

Старшы навуковы супрацоўнік Цэнтра даследаванняў беларускай культуры, мовы і літаратуры Нацыянальнай акадэміі навук Беларусі Галіна Флікоп-Світа праз сваю старонку ў сацсетцы пачала знаёміць з беларускім іканапісам. Навуковец выкладае фота старажытных абразоў, якія яна даследавала, і размяшчае спасылку на адпаведныя артыкулы.

Гэта ініцыятыва выклікала вялікую цікавасць інтэрнэт-супольнасці – допісы даследчыцы атрымліваюць шмат рэакцый і каментароў.

Фота: Галіна Флікоп-Світа, Facebook

Першыя два абразы, пра якія распавяла Галіна – Маці Божай Снежнай праваслаўнага і каталіцкага паходжання.

«Распачынаю з аднаго з маіх улюбёных абразоў "Божая Маці Снежная" канца 18 стагоддзя з вёскі Субаты Драгічынскага раёна на Палессі. Звярніце тут увагу на аблічча Багародзіцы! Вядома ж, такая прыгажосць зразумелая не ўсім. Але ж па гэтай прычыне названы абраз для мяне і стаў вельмі цёплым і дарагім. Захоўваецца ў Музеі старажытнабеларускай культуры НАН Беларусі».

Наступным Галіна размясціла абраз той жа іканаграфіі, што і папярэдні – Божая Маці Снежная – з касцёлу бернардзінцаў у Нясвіжы. Гэты абраз 17 стагоддзя таксама захоўваецца ў Музеі старажытнабеларускай культуры НАН.

«Прыгажосць бывае рознай. І прыгажосць абразоў – таксама. Раней быў прыклад наіўнага абраза прывабнага сваёй прастатой і мясцовымі паляшуцкімі тыпажамі. А зараз перад вамі прыклад стрыманай і вытанчанай прыгажосці. Для канфесійнага балансу выкладваю гэты помнік каталіцкага паходжання».

Галіна працягвае сваю ініцыятыву – сачыць за яе далейшымі публікацыямі можна на яе старонцы ў Facebook.

Наш канал в Telegram – только важное. Подписаться >