Міністр замежных спраў Польшчы падарыў беларусам арган

У Беларусі з'явіўся новы арган. У каталіцкім санктуарыі ў Лагішыне Брэсцкай вобласці завяршылася ўстаноўка аргана 2005 года пабудовы польскага майстра Багуміла Пахольскага.

Як паведаміў на сваёй старонцы арганазнаўца Аляксандр Бурдзялёў, аўтар і мастацкі кіраўнік фестывалю Ars Magna Organi, які цяпер праходзіць у Беларусі, інструмент быў падораны міністрам замежных спраў Польшчы Радаславам Сікорскім біскупу Казіміру Велікасельцу для санктуарыя Маці Божай Лагішынскай Каралевы Палесся.

Гэта адбылося яшчэ ў 2018 годзе, але «складаныя абставіны 7 гадоў не дазвалялі польскім майстрам зрабіць мантаж гэтага інструмента, і ён увесь гэты час ляжаў у Лагішыне, аднак сёлета ўжо сіламі мясцовых вернікаў ён быў змантаваны», адзначыў Бурдзялёў, які быў кансультантам пры мантажы аргана.

Першапачаткова інструмент быў усталяваны ў гасцінай дома Радаслава Сікорскага, і пасля быў падораны ім у Беларусь.

Урачыстае асвячэнне аргана адбудзецца 26 ліпеня, пасля чаго ў рамках арганнага фестывалю Ars Magna Organi на ім адбудзецца першы канцэрт.

Гэты інструмент – важнае культурнае набыццё ў маштабах краіны, падкрэсліў спецыяліст.

Раней паведамлялася, што ўсяго на тэрыторыі Беларусі налічвалася 123 арганы.