Трохдзённую вандроўку здзейснілі каталіцкія скаўты ў Беларусі - ФОТА
- Written by katolik-gomel.by
- Published in Царква
- Add new comment
Па шляху ў Гудагай да абраза Божай Маці скаўты начавалі ў лесе і гатавалі ежу на вогнішчы.
1-3 траўня група маладых і дарослых каталіцкіх скаўтаў-«вандроўнікаў», а таксама скаўтак-«правадніц», якія практыкуюць педагогіку FSE (Федэрацыі скаўтаў Еўропы) здзейснілі нацыянальную «вандроўку» па маршруце Солы - Гудагай у санктуарый Маці Божай Гудагайскай. Хлопцы і дзяўчаты ішлі да абраза Багародзіцы рознымі маршрутамі - дарогай, лесам, полем - па шляху начуючы ў лесе і гатуючы сабе ежу на вогнішчы. Шэфам сёлетняга падарожжа хлопцаў стаў Павел Бельскі, а духоўным кіраўніком - пробашч парафіі Міхала Арханёла ў Івянцы айцец Лех Баханэк OFMConv.
У пілігрымцы-вандроўцы ўдзельнічалі дарослыя скаўты ўсіх парафіяльных груп Беларусі - з Барысава, Івянца, Мінска, Гродна, Гомеля і Віцебска, а таксама госці. Група хлопцаў складалася з больш 30 чалавек, прыкладна столькі ж было і дзяўчат. У дарозе скаўты спявалі, маліліся, разважалі на духоўныя тэмы. Кожны дзень скаўты ўдзельнічалі ў Святой Імшы, якая аднойчы была праведзена наўпрост у лесе з алтаром з заплечнікаў.
Духоўнай тэмай падарожжа сталі словы Езуса Хрыста «Я ёсць Шлях, Праўда і Жыццё», а патрыятычнай - Слуцкі збройны чын у 1920 годзе. На традыцыйным «вогнішчы» хлопцы гулялі ў любімыя скаўцкія гульні, спявалі і прадстаўлялі сцэнкі аб Слуцкім паўстанні.
Завяршылася падарожжа 3-кіламетровым Шляхам святла з паходнямі па начным полі і лесе, дзе размешчана Гудагайскай кальварыя, і Імшой у санктуарыі Маці Божай Гудагайскай, дзе кожны скаўт склаў свае інтэнцыі, з якімі ішоў у гэтую вандроўку.
Related items
- Такі падарунак – толькі ад байкераў. Мотасезон яны адкрылі ў касцёле
- Ці ўступаць у піянеры, спыталі ў вернікаў – частка адказаў здзівіла
- «Пад зямлёй адчула сябе шчаслівай». Беларуска працуе ў шахце і запрашае туды на Імшу
- Загадкі Каралевы Беларусі: уратавала ад маскоўскай акупацыі, знікла і зноў аб'явілася
- Не святар: разабралі памылковую інфармацыю пра затрыманне верніка ў Омску