Біскуп Велікаселец выдае брашуры для пакалення савецкага атэізму
- Written by katolik-gomel.by
- Published in Царква
- Comments (1)
На самой справе навукоўцы прыводзяць доказы існавання Бога, а не адмаўляюць Яго.
У маі 2015 года пад рэдакцыяй дапаможнага біскупа Пінскай дыяцэзіі Казіміра Велікасельца выйшла брашура пад назвай “Усе думаюць адно і тое ж: Бог існуе”. У выданні сабраны выказванні вучоных, пісьменнікаў, філосафаў і нават атэістаў з аргументамі на карысць існавання Бога. У інтэрв’ю Беларускай рэдакцыі Ватыканскага радыё біскуп распавёў аб мэце выдання такіх брашур, бо гэта ўжо не першае падобнае выданне. “Я нарадзіўся ў пасляваенны час атэізму, і наша пакаленне перажыло вельмі вялікую атэістычную агітацыю, мы нават памятаем словы першага сакратара КПСС Хрушчова, які абяцаў хутка паказаць па тэлевізары апошняга святара”, - тлумачыць біскуп.
Калі ён быў яшчэ зусім дзіцём, у ягонай роднай вёсцы арыштавалі святара, але да першай споведзі маленькага сына рыхтаваў бацька – за 60 кіламетраў вёз хлопца на ровары ў Кобрын, дзе быў святар. Пазней у школе будучага біскупа разам з іншымі дзецьмі вучылі таму, што выбітныя вучоныя мелі матэрыялістычны светапогляд, і рознымі іншымі шляхамі настаўнікі імкнуліся схаваць праўду пра Бога. “Бог настолькі заўважны, увесь свет нам кажа пра Бога! Эйнштэйн гаворыць: вакол мяне найскладанейшая сістэма ўзаемасувязі і гармоніі, як вучоны-фізік я ведаю, што кожная з’ява мае сваю прычыну. Мендзялееў на з’ездзе хімікаў у Берліне сказаў, адказваючы на пытанне, ці верыць ён у Бога: я аддаю перавагу застацца ў сферы бессмяротнасці душы! І наш розум, і наш унутраны голас, і Святое Пісанне гавораць нам пра Бога”, - падкрэсліў іерарх.
Біскуп Казімір зразумеў, што савецкаму пакаленню, адурманенаму прапагандай атэізму, неабходна даведацца праўду пра рэлігію і пра тое, што на самой справе гаварылі пра Бога вядомыя людзі, выправіць скажоную камуністычнай ідэалогіяй інфармацыю. У сваёй першай невялікай кніжцы “Жыццё з Богам” іерарх сабраў выказванні вучоных і разнастайныя доказы існавання Бога, асноўныя звесткі аб хрысціянскім вучэнні, галоўныя малітвы. Кніжка выйшла ў выдавецтве “Про Хрысто” у 2012 г. Біскуп імкнуўся раздаваць яе прадстаўнікам інтэлігенцыі і ўсім, хто меў патрэбу ў такой інфармацыі.
“Памятаю такі выпадак у Пінскай катэдры: падыходзіць чалавек і просіць у мяне яшчэ адну такую кніжку, якую я раней даваў яму. Мужчына сказаў, што кніжку прачытаў ягоны сын і вельмі захацеў набыць яе для сябе. Людзі чытаюць гэтыя кніжкі і выказваюць падзяку. Яны вельмі неабходныя асабліва для майго пакалення, каб людзі ведалі, што на самой справе вучоныя прыводзяць доказы існавання Бога, а не адмаўляюць Яго”, - падзяліўся іерарх.
Як лічыць біскуп Казімір, і ў наш час, калі свет настолькі матэрыялізаваны, такая літаратура неабходная сучаснай моладзі і інтэлігенцыі. Ён раздае новыя брашуры, якія вышлі накладам 5 тысяч асобнікаў, усім жадаючым.
Related items
- Пад'ём у 3:30, маўчанне і ніякіх гаджэтаў. Адзіны ў свеце беларус камельдул наведаў родны горад
- Ці ўступаць у піянеры, спыталі ў вернікаў – частка адказаў здзівіла
- З 7 дзецьмі пасля 25 сутак вядомы прапаведнік пакінуў Беларусь
- «Уразіла міласэрнасць». Што здзівіла ў Беларусі самотнага пілігрыма пасля Кітая і ЗША
- Мільён праглядаў у TikTok! Папулярны кантэнт стварае каталіцкі хор з Ліды
RSS-стужка каментароў гэтага запiсу