У Брэсце абвалілася арка Бернардынскага кляштара [ФОТА]

На тэрыторыі сучаснай Брэсцкай крэпасці недалёка ад Раства-Багародзіцкага жаночага манастыра знаходзяцца руіны каталіцкага Бернардынскага кляштара. Нягледзячы на ўвагу мясцовай прэсы і намаганні валанцёраў, якія клапоцяцца аб захаванні каштоўнасці (гэтыя руіны - практычна ўсё, што засталося ад старога Брэста), пішуць звароты ў гарвыканкам, мясцовыя ўлады так і не праводзяць работу па ўмацаванні або кансервацыі руін. Як вынік - на днях абвалілася арка кляштара пры спробе яе ўмацаваць. Ніхто не пацярпеў, пры тым што як раз у момант абвальвання руіны аглядалі турысты, паведамляюць у сацсетках валанцёры.

У 1605 годзе бэрнардынамі былі ўзведзены драўляныя пабудовы, касцёл і кляштар. З ахвяраванняў Льва Сапегі і Яна Галемскага замест драўлянага пачалося будаўніцтва мураванага касцёла, які ў 1623 годзе быў асвечаны ў імя Яна Хрысціцеля і Святой Ганны. Праз год, ў 1624 годзе быў таксама заснаваны і жаночы драўляны кляштар. Пазней, на гэтым жа ўчастку быў узведзены ўжо каменны касцёл і кляштар бэрнардынак, які быў скончаны ў 1750 годзе. Кляштары бернардынцаў і бернардынак Брэста - адзіныя збудаванні гэтага ордэна ў Беларусі, што ўтварылі ансамбль, арганізаваны вакол плошчы.

У найпрыгажэйшым каталіцкім кляштары, пераробленым для патрэб крэпасці, аж да 1941 года размяшчаўся шпіталь. Тут у перыяд абароны крэпасці немцамі былі захопленыя ў палон параненыя і лекары з медсёстрамі, якіх яны потым гналі перад сабой пад кулямёты абаронцаў. У пасляваенны час будынак выкарыстоўвалася ў якасці склада ваеннай часткі, якая размяшчалася ў гэтым месцы. Пасля развалу СССР будынак паступова разбураўся.