У мінскі архікатэдральны касцёл прыходзіла міліцыя - з-за гімна «Магутны Божа»
- Written by KATOLIK.LIFE
- Published in Царква
- Add new comment
Аб гэтым паведаміў біскуп Юры Касабуцкі і дадаў, што калі пэўная малітва мае вялікую моц, то і д'ябал будзе змагацца з ёй з найбольшай сілай
Біскуп Юрый Касабуцкі, Генеральны вікарый Мінска-Магілёўскай архідыяцэзіі Рымска-Каталіцкай царквы паведаміў, што ў сталічны архікатэдральны касцёл Найсвяцейшага Імя Марыі прыходзілі сілавікі. Гэта адбылося ў нядзелю, 4 ліпеня, напісаў іерарх на сваёй старонцы ў Facebook.
- Прыйшлі супрацоўнікі міліцыі з прэтэнзіяй, што парушана нейкая там норма заканадаўства наконт малітвы «Магутны Божа». Што канкрэтна, яны не разумелі самі... Дык што ж не так з нашым любімым рэлігійным гімнам? - піша біскуп Юры Касабуцкі.
Ён нагадаў, што верш «Магутны Божа» напісала ў 1943 годзе Наталля Арсеньева. У 1947 годзе кампазітар Мікалай Равенскі напісаў музыку да гэтага вершу. Гімн стаў малітвай пасляваеннай беларускай эміграцыі. У 1993 годзе спецыяльная камісія Вярхоўнага Савета прапанавала зрабіць гэты гімн дзяржаўным гімнам Беларусі.
- На сённяшні дзень гэты гімн стаў малітвай, якая выкарыстоўваецца ў набажэнствах католікаў, праваслаўных, пратэстантаў, а таксама апошнім часам гэты гімн спяваюць людзі, якія не атаясамліваюць сябе з ніякай рэлігіяй.
Паводле біскупа, гімн «Магутны Божа» - перш за ўсё малітва за Бацькаўшчыну і за народ:
- Кожная малітва нясе ў сабе неверагодную сілу і здольная зрабіць нават вялікія цуды. Калі ж пэўная малітва мае вялікую моц, то і д'ябал будзе змагацца з ёй з найбольшай сілай і рабіць шматлікія перашкоды, каб людзі гэту малітву не ўжывалі... Чаму мы не можам спяваць «Магутны Божа»? Пытанне рытарычнае...
Нагадаем, першапачаткова планавалася, што 3 ліпеня ў каталіцкіх храмах Беларусі напрыканцы святой Імшы прагучыць гэты спеў. У Курыі Мінска-Магілёўскай архідыяцэзіі заахвочвалі святароў да выканання гімна «Магутны Божа» - каб Пан Бог бярог народ і краіну ад усяго злога.
Media
Related items
- З паходнямі і ў касцюмах: вуліцамі гарадоў Беларусі правялі Крыжовы шлях
- Месяцовае і сонечнае гало назіралі беларусы ў Вялікі тыдзень
- Аксана, Сяргей, Паліна, Павел... За тых, хто не сустрэне Вялікдзень дома, моляцца ў Вялікі чацвер
- Дзе глядзець відэа-онлайн на Вялікдзень-2024 – падборка прамых трансляцый з касцёлаў
- Абяцаныя працы не пачаліся. Паўтара гады, як зачынены Чырвоны касцёл у Мінску