Пробашч застаўся, ад арэнды памяшкання адмовіліся – што цяпер з Чырвоным касцёлам

Каталіцкія вернікі абмяркоўваць сітуацыю з закрытым Чырвоным касцёлам у Мінску пасля таго, як з'явілася афіцыйнае паведамленне аб прызначэнні адміністратара парафіі святога Сымона і святой Алены. Ім стаў ксендз Юрый Санько, а аб статусе пробашча ксяндза Уладзіслава Завальнюка ў інфармацыі нічога не гаварылася – што выклікала здагадкі і непаразуменні.

Як патлумачылі прадстаўнікі парафіі, інфармацыя аб тым, што кс. Уладзіслаў «звольнены з пасады пробашча», не адпавядае рэчаіснасці:

«У парафію прызначаны адміністратар па справах перамоваў з дзяржаўнымі ўстановамі і па пытаннях рамонту. Але кс. Уладзіслаў застаецца пробашчам парафіі, ніхто не адклікаў яго з гэтай пасады і не даваў іншага дэкрэта».

Таксама ў каментарах дадалі, што «кс. Юрыя Санько зрабілі "медыятарам" паміж дыяцэзіяй і дзяржаўнымі прадстаўнікамі, а адносна душпастырства – служэнне сакрамэнтаў і служэння св. Імшы за парафіян, клопат пра духоўнае дабро вернікаў, якія працягваюць тэрытарыяльна належыць да парафіі св. Сымона і св. Алены, – гэта надалей абавязак кс. Уладзіслава».

Прынята рашэнне пра часовае размяшчэнне і вядзенне дзейнасці парафіі святога Сымона і святой Алены ў архікатэдральным касцёле Імя Найсвяцейшай Панны Марыі – гэта азначае, што ад прапановы уладаў аб арэндзе іншага памяшкання для парафіі закрытага касцёла вырашылі адмовіцца.

Адна з верніц адзначае, што «бачыла, як даюць афіцыйны каментар пра тое, чаму не пачынаюць рамонтныя працы ў Чырвоным Касцёле»:

«Бо ніхто не выносіць рэчы з касцёла (фігуры, алтар, лаўкі...). Але навошта іх выносіць, калі там не патрэбны рамонт. «Спадчына» рабіла рамонт некалькі год таму. Улады замоўчваюць разбітыя вокны ў закрыстыі. Я так разумею, што пробашч адмовіўся выносіць рэчы з касцёла, бо дабіваўся следства ў сувязі з разбітымі вокнамі».

Афіцыйна пра расследванне пажару, пасля якога Чырвоны касцёл закрылі для вернікаў, нічога не паведамляецца. З таго часу прайшло ўжо звыш двух месяцаў.