Ксёндз Завальнюк адкрыў свой канал у YouTube. Пра што яго відэа?

Жнівень 28, 2024
Written by KATOLIK.LIFE
Published in Царква
Add new comment

Былы пробашч Чырвонага касцёла пачаў дзейнасць згодна з новай пасадай, але ў сваіх відэа разважае і на агульныя актуальныя тэмы.

У YouTube з'явіўся канал «Голас душы», на якім выкладаюць як працяглыя відэа, так і shorts з прамовамі ксяндза Уладзіслава Завальнюка. Пасля таго як вядомы святар быў звольнены з пасады пробашча Чырвонага касцёла яго прызначылі дэлегатам пастулатара дыяцэзіяльнага этапу беатыфікацыйнага працэсу Слугі Божага Эдварда Вайніловіча.

Гэтай дзейнасці ксяндза Уладзіслава Завальнюка прысвечаны новы YouTube-канал – узнаўленню беатыфікацыйнага працэсу фундатара Чырвонага касцёла, які па-ранейшаму застаецца закрытым.

У сваіх відэа ксёндз Уладзіслаў Завальнюк падрабязна распавядае пра Эдварда Вайніловіча і праз яго фігуру разважае на агульныя актуальныя тэмы: якімі прынцыпамі гуманізма кіравацца ў сваім жыцці, на што абапірацца сучаснаму чалавеку ў гэтым свеце, хто такія хросныя бацькі, як іх абраць, якія абавязкі яны маюць перад дзіцём і перад Богам.

Новую дзейнасць ксёндз Уладзіслаў Завальнюк пачаў не толькі ў віртуальнай прасторы. Нядаўна ён цэлебраваў святую Імшу ў інтэнцыі роду Вайніловічаў у парафіі святога Лукі Евангеліста і святога Марціна ў Курасоўшчыне, дзе разам з парафіянамі маліўся ў інтэнцыі беатыфікацыйнага працэсу Слугі Божага Эдварда Вайніловіча.