Каталіцкія падкасты: пра што яны і дзе шукаць

Падкасты становяцца ўсё больш папулярным відам кантэнта, асабліва ў моладзі. Падкаст – гэта лічбавы аўдыёфайл, звычайна ў фармаце размовы або маналогу, які можна спампоўваць і слухаць у любы час. Сабралі інфармацыю пра тое, дзе можна знайсці падкасты для каталіцкіх вернікаў, хто іх стварае і на якія тэмы.

Класічныя аўдыёпадкасты для беларускіх католікаў публікуе рэдакцыя Vatican News. Гэта не толькі навіны, але і рубрыкі «Старонкі гісторыі», «Разважанне на Евангелле», «Хрысціянства і літаратура», «Сацыяльнае пытанне», «Веру, ведаю, разумею», «Эфата». Хутка з'явіцца новая рубрыка – «Філасофскія нататкі», якую будзе весці ксёндз-доктар Раман Суша, выкладчык Папскага ўніверсітэта Серафікум у Рыме.

Найбольш зручна слухаць падкасты Vatican News у Тэлеграм-канале выдання. Каб пабачыць усе аўдыёфайлы, трэба перайсці на канал, націснуць уверсе на назву канала, пракруціць уніз і выбраць укладку Music.

Набіраюць папулярнасць і відэападкасты. Такі тып кантэнту на шырокія тэмы стварае каманда «Радыё Марыя» ў Беларусі і размяшчае запісы на сваёй старонцы ў YouTube. Тут можна знайсці размовы са святарамі і вядомымі дзеячамі, гасцямі студыі, краязнаўчыя, пазнавальныя перадачы.

Таксама «Радыё Марыя» стварае аўдыёпадкасты, якія размяшчае на платформе Soundcloud.

Гутаркі са святарамі на разнастайныя тэмы праводзяць некаторыя блогеры, якія выкладаюць запіс у форме відэападкастаў. У асноўным – на рускай мове. Напрыклад, шмат такіх гутарак з вядомымі святарамі ёсць на канале «Ласіны рог».

Наш канал в Telegram – только интересное и важное. Подписаться >