Наведаць Беларусь запрасілі новага Папу Рымскага каталіцкія біскупы

Дэлегацыя духоўных асоб Беларусі 21 траўня прымала ўдзел у генеральнай аўдыенцыі Папы Рымскага Льва XIV ў Ватыкане. Гэта тая дэлегацыя, якая была на інтранізацыі Льва XIV. У яе складзе Мітрапаліт Мінска-Магілёўскі арцыбіскуп Юзаф Станеўскі, Генеральны вікарый архідыяцэзіі біскуп Аляксандр Яшэўскі, сакратар Мітрапаліта, ксёндз Юрый Ясевіч, выкладчык Папскага Грыгарыянскага ўніверсітэта ў Рыме ксёндз Раман Суша.

У такім жа складзе прадстаўнікі беларускага епіскапату прыязджалі ў Ватыкан у лютым, каб сустрэцца з папярэднім Пантыфікам – Папам Францішкам. Аднак ён не змог прыняць іх з-за хваробы, таму сустрэча адбылася з Дзяржсакратаром Ватыкана.

Арцыбіскуп Юзаф Станеўскі асабіста напісаў тэкст для парталу каталіцкага епіскапату Беларусі і распавёў, як прайшла сустрэча з Папам Рымскім 21 траўня.

Пасля агульнай аўдыенцыі дэлегацыя беларускага духавенства мела магчымасць падчас кароткай асабістай сустрэчы пазнаёміць Пантыфіка з сітуацыяй Касцёла ў Беларусі, напісаў Мітрапаліт.

Ён перадаў Папе Льву XIV афіцыйнае запрашэнне наведаць Беларусь ад імя мясцовага Касцёла. Візіт Пантыфіка паспрыяў бы сустрэчы «усіх з усімі», бо Хрыстус аддаў жыццё за ўсіх людзей, перакананы арцыбіскуп.

Паводле яго, «беларускі народ будуе сваю будучыню на моцным фундаменце хрысціянскіх і сямейных каштоўнасцяў і, перажываючы 80-годдзе заканчэння Другой сусветнай вайны, — на супакоі, згодзе і міры».

Іерарх дадаў, што Папа ўдзяліў благаслаўленне «для ўсіх людзей добрай волі, якія жывуць у Беларусі, якія, перажываючы Год добраўпарадкавання, будуюць дабрабыт сваёй краіны, каб гэта ім удавалася з Божай дапамогай і папскім благаслаўленнем».

Нагадаем, папярэдняга Пантыфіка – Папу Францішка – таксама запрашалі наведаць Беларусь, але гэтага візіту не адбылося, бо неабходная сітуацыя так і не склалася. Таксама тлумачылася, якія складанасці існуюць з прыездам Папы Рымскага ў Беларусь і Расію.

Фота: скрыншот відэа Vatican News і са старонкі Аляксандра Яшэўскага ў Instagram

Наш канал в Telegram – только интересное и важное. Подписаться >