«Каб вайной не ішоў брат на брата». У Мінску католікі зладзілі набажэнства-перфоманс

13 сакавіка, у пятніцу, калі ў касцёлах падчас Вялікага посту праводзяць традыцыйныя набажэнствы Крыжовага шляху Езуса Хрыста, асаблівая падзея адбылася ў мінскай парафіі святога Францішка. Тут служаць манахі капуцыны, рэлігійную арганізацыю якіх нядаўна зарэгістравалі.

Парафіяльны хор Transitus правёў набажэнства ў выглядзе музычна-тэатральнай пастаноўкі. Гэта не першая спроба ў парафіі інтэрпрэтацыі Крыжовага шляху як рэлігійна-культурнай акцыі.

Набажэнства-перфоманс «Пакуты Хрыста ў грахах чалавека» суправаджалі сцэнкі і спевы хору, а таксама дзяцей. Парафія і некаторыя вернікі выклалі відэа ў сацсетках. Апісання таго, што адбывалася, няма, але па кадрах можна зразумець, што падчас кожнага прыпынку Крыжовага шляху ў мастацкай форме ілюстравалі некаторыя грахі: пляткарства, аборт, алкагалізм, залежнасць ад сацсетак.

У адной сцэне ўдзельніцы з'явіліся з элементамі вайсковай формы, а ў спеве хору можна пачуць адзін з заклікаў да Бога: «Каб вайной не ішоў брат на брата». Такім чынам, верагодна, быў адлюстраваны грэх вайсковай агрэсіі.

«Неверагодна моцна», «Пранізліва, проста ў душу», – такія каментары пакінулі ў сацсетках.