Кранальныя кадры: новыя святары благаславілі семінарыстаў і сваіх настаўнікаў

29 траўня шэсць новапрэзбітараў, выпускнікоў Гродзенскай семінарыі, наведалі alma mater, каб адправіць прыміцыйную Імшу і ўдзяліць благаслаўленне. На пачатку Імшы ксёндз-рэктар Ян Раманоўскі павіншаваў маладых святароў і запрасіў іх надалей лічыць семінарыю сваім домам, паведаміла навучальная ўстанова на сваёй старонцы.

Эўхарыстыю ў семінарыі ўзначаліў ксёндз Максім Ваўчок з Мастоў, прызначаны вікарыем парафіі Святой Сям’і ў Лідзе. А казанне прамовіў ксёндз Аляксей Ціхан з Ліды, якога біскуп накіраваў вікарыем у парафію Беззаганнага Зачацця Найсвяцейшай Панны Марыі ў Гродне.

Малады ксёндз у сваёй прамове разважаў пра сутнасць святарства і важнасць унутранай духоўнасці. Ён падкрэсліў, што ў служэнні галоўнае не знешнія знакі, а сэрца святара.

Напрыканцы Імшы выкладчыкі і семінарысты атрымалі прыміцыйнае благаслаўленне ад новых святароў.

Тыдзень таму ў семінарыі адправілі прыміцыйную Імшу і ўдзялілі благаслаўленне двое новапрэзбітараў з Віцебскай дыяцэзіі.

Наш канал в Telegram – только интересное и важное. Подписаться >