Папа: Нельга любіць Бога па-за Касцёлам

Пантыфік падкрэсліў, што немагчыма быць ізаляваным хрысціянінам, “самім па сабе”, таму што “хрысціянская ідэнтычнасць” характарызуецца менавіта прыналежнасцю да Касцёла. Яна з’яўляецца нібыта прозвішчам для верніка. “Калі імя: “хрысціянін”, то прозвішча: “прыналежу да Касцёла”, - сказаў Папа. “Цудоўна адзначыць, што гэта прыналежнасць была выказана таксама ў імені, якім Бог назваў сябе сам. Адказваючы Майсею, у цудоўным фрагменце пра “палаючы куст”, Ён акрэсліў сябе, як Бог айцоў. Не сказаў: “Я усемагутны”. Не! Але, Я Бог Абрагама, Бог Ісаака, Бог Якуба. Такім чынам Ён паказаў сябе, як Бога, які заключыў запавет з нашымі Айцамі і заўсёды верны яму, і які кліча увайсці ў гэтыя адносіны, якія нам папярэднічаюць. Адносіны Бога з Яго народам, папярэднічаюць усім нам, яны паходзяць яшчэ з тых часоў”, - сказаў Папа.

Паводле Святога Айца, ніхто не становіцца хрысціянінам сам па сабе. “Хрысціяне не ўзнікаюць у лабараторыі. Хрысціянін з’яўляецца часткай народа, які прыйшоў здалёк. Ён прыналежа да народу, які называецца Касцёлам”, сказаў Папа.

“Калі мы верым, калі ўмеем маліцца, калі знаёмы з Панам і можам слухаць Яго слова, калі адчуваем Яго блізка, распазнаем у братах – усё гэта таму што іншыя, перад намі, жылі верай і перадалі яе нам. Веру мы атрымалі ад нашых айцоў, нашых продкаў, і яны ёй навучылі. Калі добра падумаем, хто ведае, колькі абліччаў нашых блізкіх пройдуць перад нашымі вачыма, у гэты момант: гэта могуць быць абліччы нашых бацькоў, якія папрасілі для нас хросту, нашых бабуль ці якіх-небудзь сваякоў, якія навучылі рабіць знак крыжа і першым малітвам, (...) ці можа аблічча пробашча, іншага святара, законніцы, катэхета, якія перадалі нам змест веры і дапамаглі расці як хрысціянам. Гэта Касцёл: вялікая сям’я, у якой прымаюцца і вучацца жыць, як вернікі і вучні Пана Езуса”, - сказаў Папа.

Паводле Францішка, спакуса жыцця без Касцёла – спакуса асабістых і беспасрэдных адносінаў з Богам, з’яўляецца небяспечнай і шкоднай.

“Сапраўды, каб крочыць разам трэба шмат намаганняў, і часам гэта нават складана. Можа здарыцца так, што некаторыя браты і сёстры, будуць ствараць праблемы ці правакаваць скандалы... Але Пан даверыў сваё пасланне збаўлення людзям, усім нам, сведкам; і ў нашых братах і сёстрах, з іх дарамі і недахопамі, Ён выходзіць нам насустрач і дазваляе распазнасць сябе. Гэта азначае прыналежаць да Касцёла. Добра памятайце: быць хрысціянінам азначае прыналежаць да Касцёла. Імя: “хрысціянін”, а прозвішча: “прыналежны да Касцёла”, - сказаў Папа.

На заканчэнне агульнай аўдыенцыі Францішак нагадаў пра урачыстаць Найсвяцейшага Цела і Крыві Хрыста, якая адзначалася 22 чэрвеня 2014 г. і заклікаў знаходзіць у Эўхарыстыі сапраўдную крыніцу духоўнага насычэння.

Ватыканскае радыё