На вуліцы ў Гомелі католікі спяваюць, танчаць і прапаведуюць Хрыста - ФОТА, ВІДЭА

Кожную нядзелю Велікоднага часу Нэакатэхуменальныя суполкі гомельскай рыма-каталіцкай парафіі ладзяць евангелізацыю на вуліцы. Ва ўсім свеце ў гэты час каталікі Нэакатэхуменальнага шляху выходзяць на цэнтральныя плошчы сваіх гарадоў, каб несці мінакам Добрую вестку пра любоў і перамогу Хрыста. Паводле беларускіх законаў без дазволу ўладаў праводзіць масавыя мерапрыемствы на вуліцы забаронена, таму ў Гомелі евангелізацыя праходзіць на пляцоўцы перад храмам. Ён знаходзіцца на цэнтральнай вуліцы горада, дзякуючы чаму ўсё роўна нямала мінакоў могуць пачуць пра любоў Бога да кожнага чалавека.

Пад гітары і барабаны каталікі спяваюць пра ўваскрасенне Хрыста, танчаць і гавораць пропаведзь, зыходзячы са свайго досведу, сведчаць аб прысутнасці ўваскрослага Хрыста ў іх жыцці. Мінулая сустрэча была прысвечана пытанням пра сэнс жыцця і шчасце, а ў наступныя нядзелі вернікі будуць размаўляць аб выратаванні ў Езусе Хрысце, абвяшчэнні Евангелля і жыцці ў Касцёле.

Такія сустрэчы ля касцёла ладзяцца кожную нядзелю ў 13.30. Каталікі запрашаюць прыходзіць кожнага, каб пачуць Добрую вестку.