Прэзідэнту Беларусі накіраваны ліст па пытанні будаўніцтва касцёла ў Гомелі

Ад імя рыма-каталіцкай парафіі Унебаўзяцця Найсвяцейшай Панны Марыі, якая была зарэгістравана ў Гомелі ў 2013 годзе, Прэзідэнту Беларусі 27 жніўня накіраваны ліст.

«Спадар Прэзідэнт Рэспублікі Беларусь! Просім Вашага садзейнічання ў адраджэнні рыма-каталіцкай парафіі Унебаўзяцця Найсвяцейшай Панны Марыі ў Гомелі, - пішуць вернікі і коратка распавядаюць гісторыю парафіі. - Пасля рэвалюцыі 1917 года пачалася барацьба з адвечнай прыгажосцю - Госпадам Богам, Які - Абсалютная Любоў, Мудрасць, Святасць стварыў гэты цудоўны свет і чалавека. У 1919 годзе ў парафіі Унебаўзяцця Найсвяцейшай Панны Марыі ў Гомелі расстралялі першага каталіцкага святара, а пасля - яшчэ траіх. У 1938 годзе парафію зачынілі супраць волі вернікаў, а ў 1940 годзе касцёл - крыніцу духоўнасці і каштоўнасць архітэктуры - ўзарвалі. Але народ, які пад дзеяннем дэманічнай сілы паўстаў супраць Любові, Святасці і Мудрасці, не мае будучыні. Прыклад таму - распад СССР».

Католікі адзначаюць, што толькі з Божай ласкай магчыма перамагаць зло. Гомель на 500 тысяч жыхароў мае толькі адну каталіцкую святыню:

«Тут шмат добрых людзей, якія хацелі б не толькі развіваць сваё духоўнае жыццё, але і слухаць у храме «Авэ, Марыя», творы Баха. Вы казалі аб духоўным адраджэнні, і мы просім Вашага садзейнічання ў выдзяленні ўчастка на будаўніцтва храма. Гэта будзе наш сумесны ўдзел у адраджэнні духоўнасці ў Беларусі і ў прыватнасці ў Гомелі».

Копіі ліста накіраваныя ў Апарат упаўнаважанага па справах рэлігій і нацыянальнасцяў, старшыням абл- і гарвыканкама.

Нагадаем, зараз праходзяць грамадскія слуханні па пытанні выдзялення ўчастка пад будаўніцтва касцёла на ўскраіне Гомеля. Пакуль вядома, што больш за 150 чалавек ужо выказалі станоўчыя пісьмовыя пажаданні па будаўніцтву святыні.