Маці асуджаных за наркотыкі правялі калектыўную малітву ў Гомелі

Актывісткі ініцыятывы «Матчын рух 328» з некалькіх гарадоў Беларусі прынялі ўдзел у набажэнстве сваякоў асуджаных за наркотыкі ў праваслаўным Свята-Петра-Паўлаўскім кафедральным саборы ў Гомелі. Як распавялі удзельніцы ініцыятывы, на набажэнстве з партрэтамі сваіх асуджаных дзяцей сабраліся каля 50 чалавек. Рух маці заклікае да перагляду крымінальнага заканадаўства: размежавання адказнасці абвінавачаных за захоўванне і продаж наркотыкаў, недапушчальнасці выкарыстання незаконных метадаў у ходзе следства, правакацый.

Раней аналагічныя малебны праходзілі ў Жлобіне, Магілёве, Мінску, дзе святары звярталіся да маці з пропаведдзю, адзначаючы, што наркотыкі - гэта агульная бяда, і толькі праз малітву магчыма прабачэнне, пакаянне і адкупленне віны тых, хто не змог супрацьстаяць спакусе.