«Першае сэлфі» Папы ў Instagram узарвала інтэрнэт

14 снежня інтэрнэт-свет літаральна ўзарваў фотаздымак Папы Рымскага Францішка, выкладзены ў Instagram на неафіцыйным акаўнце Ватыкана. Спачатку здымак Папы з зіхатлівай усмешкай прынялі на першае сэлфі Францішка - менавіта з такім подпісам фота і з'явілася ў сацсетцы. Паднялася хваля абмеркаванняў, карыстальнікі масава ставілі «лайкі» і каментавалі «сэлфі Папы».

За 9 гадзін фотаздымак набраў ужо больш за 16 тысяч «лайкаў». Каментатары пісалі: «Лепшае фота лепшага чалавека, які жыве на свеце!», «Францішак добры!», дзякавалі Папе за пазітыўны настрой, выказвалі захапленне і хвалілі за прагрэсіўныя погляды.

Як неўзабаве высветлілася, фатаграфія не была зроблена як сэлфі - гэта скрыншот з відэатрансляцыі Google Hangout. Але і гэты факт не засмуціў карыстальнікаў Instagram.

Нагадаем, Папа Францішак хоць і прызнаецца, што яму ў яго ўзросце (хутка Пантыфіку споўніцца 79 гадоў) цяжка даюцца сучасныя тэхналогіі, аднак імкнецца не пакідаць без увагі інтэрнэт і заклікае актыўна прапаведаваць Хрыста ў сусветнай павуціне. Ёсць у Папы Рымскага і асабісты акаўнт на Твітэры, які налічвае больш за 22 мільёны падпісчыкаў.