Топ-5 фота і відэа Рарат – незвычайных Імшаў, якія пачаліся ў касцёлах

У каталіцкіх парафіях 1 снежня пачаліся Рараты – незвычайныя святыя Імшы, якія праводзяць толькі на працягу аднаго перыяду ў годзе, Адвэнту – часу радаснага чакання Прыйсця Збавіцеля. 

З першых фота і відэа Рарат мы выбралі тыя, што апублікавалі парафіі ў Смаргоні, Радуні і Варнянах.

Рараты прысвечаныя Найсвяцейшай Панне Марыі ў знак падзякі за яе згоду прыняць Божую Волю – стаць Маці Месіі, Езуса Хрыста. Звычайна раратнія святыя Імшы адпраўляюць у 6-7 гадзін раніцы (у некаторых парафіях – па вечарах пасля заходу сонца).

Асабліва на гэтыя службы запрашаюць дзяцей, якія ўрачыста падыходзяць да алтара з ліхтарыкамі (глядзіце ніжэй).

«Адвэнт – гэта час, калі Касцёл асабліва не спіць у чаканні прыйсця Месіі. Духоўна вучымся перажываць Яго трэцяе прыйсце – паміж першым і другім: у Слове, у сакрамэнтах і ў нашай штодзённай гісторыі. Рараты дапамагаюць абудзіць у сабе дух чакання і сілкаваць сваё сэрца Словам і Нябеснай Ежай – Святой Камуніяй», – патлумачыў святар.

Раратнія святыя Імшы праводзяць у цёмны час сутак як сімвал чакання Святла з Нябёсаў – прыйсця Хрыста. Рараты пачынаюцца ў змроку, парафіяне трымаюць запаленую свечку, а падчас гімна «Слава на вышынях Богу» ў храме ўключаюць святло.

Яшчэ адна асаблівасць Раратаў – свечка, якая стаіць ля алтара і сімвалізуе Найсвяцейшую Дзеву, якая як ранішняя зара абвясціла узыход Сонца Праўды – Езуса Хрыста. А сваю назву Імшы атрымалі ад першага радка песні на латыні, якая спяваецца на ўваход святара: «Rorate coeli desuper» – «Дайце, нябёсы, росы з вышыняў».