Гомельскія скаўты правялі ў лесе свой першы самастойны «летнік» [фотагалерэя]
- Written by gomel.catholic.by
- Published in Скаўты - Гомель
- Comments (2)
Ужо праз тыдзень хлопцы і дзяўчаты адправяцца ў пешую пілігрымку ў Будслаў на святкаванне 400-годдзя прабывання абраза Маці Божай.
У Гомельскім раёне скаўцкая дружына імя палескага святога Андрэя Баболі правяла свой першы самастойны «летнік». Раней гомельцы ўжо ўдзельнічалі ў гэтай скаўцкай «падзеі года», але далучаліся да хлопцаў з іншых рэгіёнаў. У гэты раз «летнік» цалкам арганізавалі самі.
Хлопцы, дзяўчаты і дарослыя скаўты жылі ў лесе, дзе на маляўнічым беразе Сожа разбілі лагер і вучыліся знаходзіцца ў натуральных умовах. Вядома, дзеці мелі стасункі, гулялі і ладзілі святыя Імшы прама на прыродзе. Каб духоўна падтрымліваць рабят на «летніку», разам з імі ў лесе жыў вікарый гомельскай рыма-каталіцкай парафіі айцец Дамінік.
Хлопцы і дзяўчаты самі рыхтавалі сабе ежу і будавалі месцы для начлегу з падручных матэрыялаў, мылі сваю вопратку. Скаўты купаліся, рыбачылі, гулялі ў «Вялікую скаўцкую гульню», правялі ўласную спартакіяду і перажылі шмат прыгод. А кожную раніцу пачыналі шыхтаваннем пад гук рогу і гімнам-малітвай з просьбай да Госпада асвяціць ўсе справы, запланаваныя на дзень. На «Летніку» ў скаўты ўступілі пяцёра новых хлопцаў.
Многія з адпачываючых падыходзілі да хлопцаў, каб пацікавіцца іх «летнікам», некаторыя нават пыталіся, як уступіць у скаўты. У лес на Эўхарыстыю прыйшоў жыхар Старых Дзятлавічаў, адзіны ў сваёй вёсцы каталік. Дзякуючы «летніку» ён змог прыняць святую Камунію, таму што прыязджаць на Імшу ў гомельскі касцёл часта не мае магчымасці.
Ужо праз тыдзень гомельскія скаўты амаль у поўным складзе сустрэнуцца зноў, каб адправіцца ў пешую пілігрымку ў Будслаў, дзе адбудзецца святкаванне 400-годдзя прабывання абраза Маці Божай.
Related items
- «У парафіі 15-20 асоб». Мітрапаліт абвясціў акцыю па падтрымцы Касцёла на Магілёўшчыне
- Беларусы даказваюць у судах «польскія карані» – з дапамогай веры
- Не фэйкі і не хакеры: «Радыё Марыя» працягвае збор і тлумачыць непаразуменні
- У Ізраілі католікі з Беларусі спакойна перажылі атаку Ірана, але «вайна дастала»
- Без цуду, але з падтрымкай: як «Радыё Марыя» выходзіць з цяжкай сітуацыі
RSS-стужка каментароў гэтага запiсу