Гомельскія скаўты правялі свой першы «Дзень братэрскай думкі»

Традыцыйнае штогадовае скаўцкае мерапрыемства «Дзень братэрскай думкі» (ДБД) правялі ў Гомелі мясцовыя скаўты. Раней хлопцы далучаліся да ДБД скаўтаў з іншых гарадоў, а ў гэтым годзе ўпершыню ладзілі гэтае мерапрыемства самі.

Хлопцы прыдумалі праграму свята, у якую ўваходзілі сцэнкі, гульні, песні і вогнішча, аднак нечаканы лютаўскі дождж не дазволіў скаўтам выехаць на прыроду. Пасля ўдзелу ў нядзельнай Імшы і шыхтавання каля касцёла давялося праводзіць ДБД у памяшканні храма.

Таксама скаўты размаўлялі аб планах на будучы «вясеннік» і летнюю паездку на «Еўраджэм» у Францыю. Радаснай падзеяй ДБД стала стварэнне ў гомельскім «звязе» новага скаўцкага «кап'я». Цяпер акрамя «коп'яў» Арол і Бык у Гомелі з'явілася «кап'ё» Рысь, у якое ўвайшоў адзін дасведчаны скаўт і двое новенькіх.