Вядомую верніцу ў Магілёве збіла машына, біскуп прасіў аб малітве. Што было далей?

Люты 4, 2024
Written by KATOLIK.LIFE
Published in Соцыум
Add new comment

Пані Ірына – з сям'і рэпрэсаваных за веру. Яна нарадзілася ў Казахстане, а затым разам з маці прыехала ў Магілёў і стаяла ля вытокаў адраджэння каталіцкай парафіі. З часу вяртання касцёла – кожны дзень у храме.

Генеральны вікарый Мінска-Магілёўскай архідыяцэзіі біскуп Аляксандр Яшэўскі ў сваім Instagram прасіў аб малітве за парафіянку. У сторыс іерарх распавёў, што пажылую жанчыну збіла машына, бабуля ў рэанімацыі.

Пазней пра ДТЗ паведаміла ДАІ УУС Магілёўскага аблвыканкама. Увечары 30 студзеня 49-гадовая кіроўца Nissan на скрыжаванні не саступіла дарогу пенсіянерцы, якая пераходзіла дарогу на зялёнае святло.

Тэму працягнулі мясцовыя паблікі ў сацсетках – са слоў чытачоў яны пісалі, што жанчына – паважаная парафіянка касцёла, яна ў рэанімацыі, у яе сур'ёзная траўма нагі, прыйшлося рабіць аперацыю. «Грош цана святару, калі ён не наведае бабулю ў лякарні!», – з выклікам напісаў адзін з каментатараў.

Katolik.life адказалі ў парафіі Унебаўзяцця Найсвяцейшай Панны Марыі і Святога Станіслава, што з бабуляй зараз:

«Яе перавялі з рэанімацыі ў аддзяленне траўматалогіі, стан нармальны. Прадстаўнікі парафіі яе наведваюць пастаянна. Біскуп Аляксандр асабіста даведваўся, дзе канкрэтна яна знаходзіцца і гадзіны наведванняў».

Імя жанчыны – Ірына Шлякава, ёй 84 гады. На жаль, пра яе нічога не пісалі ў каталіцкай прэсе – мы знайшлі толькі ўзгадку пра тое, што ў 2016 годзе ў Будславе падчас урачыстасцяў 25-годдзя заснавання Мінска-Магілёўскай мітраполіі яна была сярод тых, хто атрымаў з рук папскага пасланніка кардынала Крыстафа Шонбарна ганаровыя граматы «За ўклад у станаўленне і развіццё Каталіцкага касцёла ў Беларусі».

Затое пра пані Ірыну падрабязна распавядаў мясцовы свецкі рэсурс:

«У храме пані Ірыну можна сустрэць кожны дзень. Худзенькую, сціпла апранутую, заўсёды з добрай усмешкай. Па нядзелях яна дзяжурыць у касцёле і вельмі радая ўсім, хто заходзіць. Асабліва моладзі».

Аказалася, што Ірына Шлякава нарадзілася ў Казахстане, куды з Магілёва саслалі яе маці ў 1930 годзе за тое, што яна не адмовілася ад веры. Толькі ў 1958 годзе юная Ірына разам з мамай прыехалі ў Магілёў. І адразу з вакзала адправіліся да касцёла – убачылі яго закрытым, абгарэлым, і заплакалі.

З тых часоў яны сталі маліцца разам з іншымі католікамі на могілках і змагацца за вяртанне храма вернікам. Толькі ў 1990 годзе гэта адбылося. З таго часу пані Ірына – амаль кожны дзень на службе. Вернікі спадзяюцца, што пасля выпіскі з лякарні зноў сустрэнуць яе ў храме.