Іншае меркаванне: не трэба баяцца Лабубу і астатніх цацак-«монстраў»

Адзіная ў апошні час тэма, якая выклікала ў сацсетках больш-менш жывую дыскусію каталіцкіх вернікаў Беларусі – перасцярога святара-экзарцыста адносна цацак Лабубу.

Таму мы вырашылі працягнуць тэму, каб не ўводзіць вернікаў у зман – тым больш, што многія не пагадзіліся са святаром – і прывесці альтэрнатыўныя меркаванні.

Як мы адзначалі, відэа было размешчана на канале, які прасоўвае канспіралогію – верагодна, аўтары выкладалі святару інфармацыю пра Лабубу ў духу тэорыі змовы, таму ў яго і склалася адпаведнае меркаванне.

У цэлым, зыходзячы з агляду выступаў іншых святароў на гэтую тэму, можна зрабіць выснову, што ні Лабубу, ні іншых цацак-«монстраў» баяцца не варта і не трэба забараняць дзецям гуляць з імі.

Пра гэта кажа, напрыклад, праваслаўны святар, які вядзе канал у TikTok. Ён падкрэслівае, што бацькам важна назіраць, як дзіця гуляе з любымі цацкамі, нават звычайнымі лялькамі – дае ёй магчымасць быць добрай, або выкарыстоўвае як агрэсара і разбуральніка:

«Калі сцэнар добразычлівы, то любы монстр можа дапамагчы дзіцяці. Калі сцэнар агрэсіўны, то бацькам варта ўмяшацца».

Падобныя меркаванні выказалі і некаторыя каталіцкія святары Беларусі, якія маюць адпаведныя досвед і спецыялізацыю. Яны таксама адзначаюць, што не трэба баяцца цацак, і што калі наступствы ад гульні з «монстрамі» і могуць узнікаць, то толькі ў сукупнасці з фактарамі духоўнага жыцця чалавека.

Прыводзім таксама меркаванне аднаго са свецкіх вернікаў, крыху перафразаванае:

«Размовы пра тое, што д'ябал у цацках, Хагі Вагах, у чорціках з рожкамі на вокладках могуць быць на карысць самому злому духу з-за змяшчэння акцэнтаў. Можа, лепш казаць, што д'ябал у шлюбнай нявернасці, у гатоўнасці прадаць усё за грошы, славу і ўладу, у рэальным глыбокім пакланенні папсовым кумірам, у адсутнасці міласэрнасці, у сваім цэлюлітным Эга, што д'ябал там, дзе мы не чуем блізкага свайго...»

Наш канал в Telegram – только интересное и важное. Подписаться >