Нечаканыя падрабязнасці руйнавання капліцы на Смаргоншчыне распавёў мясцовы жыхар

Пасля дарожнага інцыдэнту, калі ў вёсцы Расла Смаргонскага раёну кіроўца аўто зруйнаваў прыдарожную каталіцкую капліцу, падрабязнасцяў ад афіцыйных крыніц дагэтуль не з'явілася.

Як кіроўца здзейсніў ДТЗ, ці быў ён п'яны – не паведамілі. Аднак мы заўважылі ў сацсетцы расповед мясцовага жыхара, які сцвярджае, што ведае, як усё адбылося. Паводле яго, 25-гадовы кіроўца быў у стане моцнага алкагольнага ап'янення і спяшаўся, каб забраць са школы дзіця.

На дарогу пад колы раптоўна выскачылі гусі, што паспрыяла аварыі. Адна з птушак загінула. Нагадаем, пасля ўдару ў капліцу аўто перавярнулася і таксама было цалкам разбіта, аднак кіроўца цудам не пацярпеў.

Калі ўсё гэта праўда, атрымліваецца, што магла б здарыцца яшчэ большая трагедыя – калі б кіроўца даехаў да школы, забраў дзіця і вяртаўся з ім дадому ў стане моцнага ап'янення ён мог бы трапіць у аварыю разам дзіцём.

Паводле мясцовага жыхара, кіроўца сам жыве ў вёсцы Расла недалёка ад зруйнаванай капліцы. Дзіця, за якім ён быццам бы ехаў, – не яго роднае.

Пацвердзіць усё гэта немагчыма, але такія падрабязнасці распавядаюць адзін аднаму вяскоўцы. Тое, што кіроўца быў моцна п'яны, сцвярджаюць у каментарах яшчэ некалькі мясцовых жыхароў.

Разбураная капліца была гісторыка-культурным помнікам XIX стагоддзя, таму акрамя пакарання на ДТЗ кіроўцу, верагодна, давядзецца выплочваць дзяржаве буйную суму. Мы знайшлі звесткі пра падобны выпадак, які адбыўся таксама ў Смаргонскім раёне ў 2021 годзе: тады п'яны кіроўца толькі пашкодзіў капліцу XIX стагоддзя на тэрыторыі Каранёўскага сельсавету. Згодна з заключэннем эксперта філіяла «Белрэстаўрацыі», шкода склала звыш 10 тысяч рублёў, якія праз суд па пазове раённага пракурора спагналі з вінаватага.

Наш канал в Telegram – только интересное и важное. Подписаться >