Толькі адзін касцёл у Беларусі будуць рэстаўраваць сёлета за кошт рэспубліканскага бюджэту. І гэта не Будслаў

Адзін каталіцкі храм згадваецца ў дзяржаўнай інвестыцыйнай праграме на 2026 год. Гэта праграма, якая прадугледжвае выдзяленне сродкаў з рэспубліканскага бюджэту на будаўніцтва і рэканструкцыю важных аб'ектаў, у тым ліку – храмаў.

Як вядома, Нацыянальны санктуарый у Будславе – касцёл Унебаўзяцця Найсвяцейшай Панны Марыі, помнік архітэктуры і цэнтр паломніцтваў, абвешчаны, па жаданні ўладаў, «духоўным цэнтрам католікаў Беларусі», востра мае патрэбу ў працягу аднаўлення пасля пажару. У прыватнасці, неабходна замена часовага даху на пастаянны і правядзенне далейшай рэстаўрацыі.

Але падобна, што фінансаванне гэтых работ з дзяржбюджэту не прадугледжана. Пра якую-небудзь іншую дзяржаўную падтрымку «духоўнага цэнтра» пакуль не паведамлялася.

Інвестпраграма абумоўлівае выдзяленне сродкаў на іншы вядомы каталіцкі храм, які знаходзіцца ў дзяржаўнай уласнасці.

Гэта – касцёл Божага Цела ў Нясвіжы. Як мы распавядалі раней, праект па рэстаўрацыі яго інтэр'ераў прадугледжваў выдзяленне 34 млн рублёў, але пакуль сумы значна меншыя. Інвестпраграмай прадугледжана выдзяленне па 4 млн рублёў на 2026, 2027 і 2028 гады, а завяршэнне рэстаўрацыі запланавана на 2029 год.

Адзначым, што дзяржава ўкладвае ў гэты храм грошы для прыцягнення турыстаў і разглядае яго ў першую чаргу як турыстычны аб'ект.

Акрамя таго, з бюджэту Мінска будзе прафінансавана далейшая рэканструкцыя Чырвонага касцёла і храма на Кальварыйскіх могілках – абодва аб'екты таксама знаходзяцца ва ўласнасці дзяржавы.

Працы ў гэтых касцёлах прадугледжаныя інвестыцыйнай праграмай Мінска і павінны завяршыцца да канца 2026 года. Толькі сімвалічная сума прадугледжана на фінансаванне рэканструкцыі Чырвонага касцёла ў 2027 годзе – верагодна, на мерапрыемствы па ўводзе будынка ў эксплуатацыю.

Наш канал в Telegram – только интересное и важное. Подписаться >