Католікі, праваслаўныя і пратэстанты маліліся разам у Беларусі

У рамках Тыдня малітваў аб адзінстве хрысціянаў, які праходзіў у Каталіцкай царкве, у некалькіх гарадах Беларусі адбыліся экуменічныя Набажэнствы. У Віцебску 22 студзеня па запрашэнні біскупа Алега Буткевіча разам з католікамі маліліся праваслаўныя, уніяты, баптысты і лютэране. У Магілёве на запрашэнне каталіцкага духавенства адгукнуліся уніяты і евангелісты - у абласным цэнтры сумеснае Набажэнства прайшло 23 студзеня, узначаліў яго біскуп Аляксандр Яшэўскі. Таксама 23 студзеня ў Гродне прайшло экуменічнае Набажэнства з удзелам католікаў, праваслаўных, уніятаў і лютэранаў.

У Мінску на завяршэнне Тыдня малітваў аб еднасці хрысціян 23 студзеня ў архікатэдральным касцёле Імя Найсвяцейшай Панны Марыі прайшло ўжо традыцыйнае экуменічнае набажэнства, у якім прынялі ўдзел прадстаўнікі розных хрысціянскіх Цэркваў і супольнасцей.

З боку Каталіцкага Касцёла ў Беларусі ў набажэнстве прымаў удзел Мітрапаліт Мінска-Магілёўскі арцыбіскуп Тадэвуш Кандрусевіч. Набажэнства распачалося з урачыстай працэсіі, падчас якой былі прынесеныя прадметы-сімвалы: Біблія, бохан хлеба, соль, вада і свечка, паведамляе Catholic.by.

Экуменічнае набажэнства ўключала ў сябе супольную малітву да Святога Духа, малітвы паяднання, чытанне ўрыўкаў з Евангелля, рэспансарыйны псальм, а таксама прамову кожнага прадстаўніка хрысціянскай Царквы ці супольнасці. У сваіх выступленнях прадстаўнікі хрысціянскіх Цэркваў і супольнасцей гаварылі пра важнасць яднання з мэтай абвяшчэння Евангелля.

«Міжхрысціянскі дыялог павінен рэалізоўвацца ў штодзённым жыцці (...). Гэта нялёгкая справа, але яна неабходна, калі мы хочам захаваць хрысціянства перад націскам секулярызму і адмаўлення ад хрысціянскіх каштоўнасцяў, — адзначыў іерарх. — Не трэба баяцца, што можам нешта страціць. Наадварот, разам даючы сведчанне нашаму хрысціянству і абвяшчаючы Евангелле, мы ўзаемна абагачаемся», — заключыў Тадэвуш Кандрусевіч.