У сеціве з'явіўся фільм кардынала Казіміра Свёнтка [ВІДЭА]

У Youtube з'явілася унікальная дакументальная стужка «Пінск - сталіца Палесся», якую ў 1968 годзе стварыў і агучыў на польскай мове першы беларускі кардынал Казімір Свёнтэк. У 30-хвілінным фільме кардынал, 100-годдзе якога адзначалі ў 2014 годзе, распавядае гісторыю горада над Пінай і знаёміць гледачоў з прыродай Палесся. Аблічбаваў стужку вядомы мінскі рэжысёр хрысціянскага дакументальнага кіно Юрый Гарулёў.

Каталіцкі іерарх, на той час - святар пінскай катэдры, які нядаўна вярнуўся са сталінскіх лагероў, займаўся аматарскімі здымкамі і не меў умоваў для стварэння якаснай стужкі, аднак фільм перадае каларыт Пінска. Барбара Шыманская, у доме якой здымаў пакой Казімір Свёнтэк, пасля смерці іерарха перадала ягоны архіў Каталіцкай царкве.