У касцёлах Беларусі праводзяць Крыжовы шлях перапрашэння за ўсе знявагі Крыжа
- Written by Katolik.life
- Published in Царква
- Add new comment
Арцыбіскуп Кандрусевіч: «Тыя, хто імкнецца знішчыць хрысціянства, знішчае крыжы»
5 красавіка ў каталіцкіх храмах ўсёй Беларусі праводзяць Набажэнства Крыжовага шляху, каб перапрасіць за ўсе знявагі Крыжа на беларускай зямлі. Да гэтага заклікаў старшыня Канферэнцыі каталіцкіх біскупаў у Беларусі мітрапаліт Тадэвуш Кандрусевіч у сувязі з сумнымі падзеямі ў Курапатах, дзе, на месцы масавых расстрэлаў рэпрэсаваных, улады знеслі тэхнікай 70 крыжоў, устаноўленых грамадскасцю.
- Тыя, хто імкнуўся знішчыць Хрыста, прыбілі Яго да крыжа, а тыя, хто імкнецца знішчыць хрысціянства, знішчае крыжы. На жаль, гісторыя нашай зямлі ведае шмат прыкладаў такога страшнага святатацтва, як знішчэнне крыжоў і храмаў, а памяць чалавечая захавала таксама і тое, які незайздросны лёс пазней спасціг найбольш апантаных «змагароў» з Укрыжаванай Любоўю, - цытуе іерарха Catholic.by.
У разважаннях падчас Набажэнства мітрапаліт параіў выкарыстоўваць словы, якія біскуп Аляксандр Яшэўскі размясціў на сваёй старонцы ў Facebook:
- Крыж - знак збаўлення кожнага чалавека Хрыстом! Крыж - знак бязмежнай любові Бога да чалавецтва! Так, як сёння аднесліся да Крыжоў у Курапатах, напаўняе сэрца болем, смуткам, пакідае шмат пытанняў і задумы аб будучыні нашай Бацькаўшчыны! Так рабіць нельга ў краіне, дзе ўсе прызнаюцца да нашых хрысціянскіх каранёў! Буць праслаўлены Крыж Хрыста Збаўцы!
Нагадаем, у Вялікі пост кожную пятніцу ў каталіцкіх храмах ладзяць Набажэнствы Крыжовага шляху, якія аднаўляюць ў памяці хрысціян асноўныя моманты пакут Крыжовага шляху Езуса Хрыста. Набажэнства складаецца з 14 стацый, якія ўяўляюць сабой успамін эпізодаў пакутаў Сына Божага, а таксама ўступлення і заканчэння. Традыцыйна на сценах каталіцкіх храмаў змяшчаюцца па перыметры чатырнаццаць абразоў ці скульптурных кампазіцый, адпаведных чатырнаццаці стацыям Крыжовага шляху. Такім чынам вернікі падчас Набажэнства абыходзяць ўвесь храм.
Media
Related items
- Кветкі, ровары, жанчыны: замалёўка з Імшы ля прыдарожнага крыжа
- «Трымаецца, не скардзіцца, просіць аб малітве». Святар з Валожына – паўгода ў зняволенні
- Як усміхаецца найстарэйшы іерарх Беларусі? Неафіцыйны рэпартаж з Янава
- У Беларусі прызнаны гісторыка-культурнай каштоўнасцю каталіцкі абрад «Тры каралі»
- Дыскатэкай на ўсю вуліцу адзначаюць на Гродзеншчыне... Першую Камунію ў дзяцей