Ва ўсіх дыяцэзіях Беларусі католікам дазволілі не ўдзельнічаць у нядзельнай Імшы з-за COVID-19

Ва ўсіх дыяцэзіях Беларусі аднаўляецца рэалізацыя мер у сувязі з распаўсюдам каронавіруснай інфекцыі. Раней такое рашэнне прынялі ў Гродзенскай дыяцэзіі і Мінска-Магілёўскай архідыяцэзіі, а 23 кастрычніка стала вядома аб аналагічных рашэннях у Пінскай і Віцебскай дыяцэзіях.

Біскупы паведамілі аб тым, што ўдзяляюць дыспенсу ад удзелу ў нядзельнай і святочнай святой Імшы наступным катэгорыям вернікаў:

- асобам пажылога ўзросту, якім асабліва пагражае інфекцыя каранавірусу;

- асобам з сімптомамі COVID-19;

- дзецям і школьнікам, а таксама асобам, якія імі непасрэдна апякуюцца;

- асобам, якія баяцца заражэння каранавірусам.

Тым, хто будзе карыстацца дыспенсай, рэкамендуецца яднацца з вернікамі, сабранымі на св. Імшы, пры дапамозе сродкаў электроннай камунікацыі і прымаць духоўную святую Камунію, гаворыцца ў паведамленнях, апублікавых Catholic.by.

У той жа час пробашчы і адміністратары парафій абавязаны прыкласці ўсе намаганні, каб у святынях і месцах душпастырскіх сустрэч былі захаваныя адпаведныя правілы гігіены: заахвочваць вернікаў карыстацца маскамі ці іншымі сродкамі аховы, забяспечыць магчымасць выкарыстання сродкаў дэзінфекцыі, а калі дазваляюць магчымасці, стварыць умовы для сацыяльнай дыстанцыі.

Рэлігійныя сустрэчы і іншыя мерапрыемствы могуць быць перанесеныя на іншы час з-за складанай эпідэмічнай сітуацыі.

У апошні час у прэсе паведамлялася ўжо пра два выпадкі смерці каталіцкіх святароў у Беларусі, якія праходзілі лячэнне ў шпіталях ад каронавірусу.