Самы высокі над Беларуссю помнік усталявалі ў Наваградку

Скульптуру святога Міхала Арханёла усталявалі пры касцёле ў Наваградку на 7-метровай калоне. Гэты святы з'яўляецца сімвалам горада – ягоная выява змешчана на гербе. Наваградак знаходзіцца на вышыні 292 метры над узроўнем мора і лічыцца самым высокім горадам Беларусі. Гэта значыць, што фігура святога Міхала Арханёла стала той скульптурай, якая размешчана вышэй за ўсе астатнія помнікі ў краіне.

«Нарэшце адбылася своеасаблівая інтранізацыя [уваходжанне на прастол, узвядзенне на трон] святога Арханёла Міхала над Беларуссю ў самым высока заселеным пункце ў краіне. Цяпер фігура нагадвае, хто заступаецца за наш край!», – паведаміў 28 траўня аб усталяванні скульптуры пробашч рыма-каталіцкай парафіі святога Міхала Арханёла ў Навагрудку ксёндз Юрый Жэгарын.

У хрысціянстве святы Міхал Арханёл – гэта Князь войска нябеснага, абаронца ад злога духа, праціўнік сатаны, заступнік пацярпелых ад несправядлівасці і беззаконня.