Праваслаўныя ў касцёле, католікі ў мячэці. Топ-5 навін рэгіёнаў

Працягваем збіраць найбольш яркія навіны каталіцкіх парафій у рэгіёнах Беларусі – выбралі 5 самых цікавых падзей за мінулыя выхадныя (фота глядзіце ніжэй).

У Заслаўі ў касцёле Нараджэння Найсвяцейшай Дзевы Марыі адзначылі парафіяльны фэст і асвяцілі адноўлены алтар. Адпраўляць святую Імшу запрасілі ксяндза Уладзіслава Завальнюка. На свята ў касцёл прыйшлі праваслаўныя вернікі: клірык мясцовага прыхода іерэй Вячаслаў Шафарэнка, які на беларускай мове павіншаваў католікаў, а таксама мастачка Анастасія Балаш з дзецьмі.

Парафія з Дзятлава здзейсніла пілігрымку да Маці Божай Барунскай і па дарозе завітала ў Іўе, дзе наведала не толькі касцёл, але і мячэць.

У Будславе адзначылі «дзень нараджэння» касцёла. У 1767 годзе быў закладзены краевугольны камень велічнай базілікі, якая стала адной з самых грандыёзных і прыгожых храмаў Рэчы Паспалітай таго часу. 7 верасня 1783 года касцёл быў асвечаны – з таго часу ў гэты дзень штогод запальваюцца свечкі.

У Смаргоні благаславілі адноўленую фігуру Божай Маці, якая была разбіта пры нападзе на касцёл у снежні 2023 года. Напярэдадні дня нараджэння Багародзіцы ў парафіі атрымалі навіну аб тым, што растаптаная на кавалкі фігура Марыі адрэстаўравана. Было вырашана размаляваць яе хітон ў жалобны колер і падпісаць Mater Dolorosa (Маці Балесная) – як сімвал гэтага і іншых цярпенняў, якія Панна Марыя церпіць разам з сваім Сынам ад людзей, каб фігура засталася балеснай памяткай для ўсіх.

Пілігрымка з Магілёва прыйшла ў Бялынічы, дзе прайшлі ўрачыстасці Маці Божай Бялыніцкай, Каралевы Беларусі. Святую Імшу адправіў Генеральны вікарый Мінска-Магілёўскайі архідыяцэзіі біскуп Юрый Касабуцкі, святу папярэднічала 40-гадзіннае набажэнства.